Schwarzer hættur með ástralska landsliðinu | Fer ekki á HM

Ástralinn Mark Schwarzer hefur ákveðið að hætta með landsliðinu en hann hefur undanfarin ár staðið á milli stanganna hjá ástralska landsliðinu.

Liðið hefur nú þegar tryggt sér sæti á heimsmeistaramótinu í Brasilíu á næsta ári og var talið fullvíst að leikmaðurinn myndi leika með liðinu á mótinu, en svo verður ekki.

Schwarzer gekk í raðir Chelsea í sumar frá Fulham og er hann í dag varamarkvörður liðsins en Tékkinn Petr Cech er aðalmarkvörður Chelsea.

Leikmaðurinn á 109 landsleiki fyrir Ástrali og hefur leikið fyrir landsliðið í um tuttugu ár.

Þessi 41 árs leikmaður tilkynnti ástralska sambandinu ákvörðun sína í morgun, aðeins nokkrum klukkustundum áður en Ange Postecoglou, landsliðsþjálfari Ástralíu, ætlaði að tilkynna hópinn fyrir vináttu landsleik liðsins gegn Costa Rica.