Sigrún tekin fram yfir Ólínu

Stefán B. Sigurðsson rektor hefur boðið Sigrúnu Stefánsdóttur starf sviðsforseta hug- og félagsvísindasviðs við Háskólann á Akureyri. En Ólína Þorvarðardóttir hlaut flest atkvæði þegar greidd voru atkvæði um umsækjendur hjá félagsvísindasviði skólans í sumar.

Ólína segist eiga eftir að skoða gögn málsins sem hún hafi enn ekki fengið að sjá til að átta sig á rökunum í málinu.

„En eins og þetta blasir við mér núna þá sýnist mér þarna opnað fyrir mikla geðþóttastjórnsýslu, satt að segja. Ég hef áhyggjur af því og finnst það slæmt fordæmi fyrir akademíska starfsmenn og aðra sem sækja um opinber störf,“ segir Ólína.

Staða sviðsforseta var auglýst til umsóknar í apríl með umsóknarfresti til 6. maí. Fimm sóttu í upphafi um stöðuna og komst dómnefnd að þeirri niðurstöðu að fjórir umsækjenda teldust hæfir, en einn dró umsókn sína til baka.

Eftir að umsækjendur höfðu kynnt sig fyrir starfsfólki félagsvísindasviðsins fór fram atkvæðagreiðsla um umsækjendur og hlutu Ólína og Rögnvadlur Ingþórsson þá jafnmörg atkvæði eða 16 en Sigrún Stefánsdóttir hlaut þrettán atkvæði. Í annari atkvæðagreiðslu þar sem kosið var milli Ólínu og Rögnvaldar hlaut Ólína 20 atkvæði en Rögnvaldur 19.

Þegar þetta lá fyrir ákvað stjórn Háskólans á Akureyri að láta fara fram annað hæfnismat og kallaði Capacent Gallup til leiks til að framkvæma það, sem nú hefur leitt til þess að Sigrún Stefánsdóttir hefur verið ráðin.

„Það er alla vega ljóst samkvæmt lögum og reglum hvað á að meta og með hvaða hætti við ráðningar í störf af þessu tagi. Og það er alveg ljóst að það var farið útfyrir auglýstan og hefðbundinn ráðningarferil í þessari málsmeðferð,“ segir Ólína. Þannig að hún velti fyrir sér hvers vegna annað ráðningarferli var sett af stað en lagt var upp með.

Í tilkynningu frá Háskólanum segir að Sigrún hafi verið ein af sex umsækjendum um starfið og komið sterkust út í niðurstöðu dómnefndar og einnig í skýrslu Capacent en ekki hafi náðst fram meirihlutaálit sviðsins í kosningu á sviðsforseta.

Ólína segir að hún hafi haft góða von um að fá starfið ef allt væri með felldu og verið farin að hlakka til að komast aftur inn í háskólasamfélagið. Niðurstaðan sé henni því vonbrigði.