10-15 manna verksmiðja hefur rekstur á Kópaskeri

Niðursuðuverksmiðja hefur tekið til starfa á Kópaskeri í byggingu sem áður hýsti rækjuverksmiðju. Tíu manns hafa þegar fengið þar vinnu og stefnt að því að fjölga upp í fimmtán starfsmenn við að sjóða niður lifur, hrogn og makríl.

Það þótti mikið áfall fyrir samfélagið á Kópaskeri þegar rækjuverksmiðjunni var lokað fyrir áratug. Tólfhundruð fermetra fiskverkunarhúsið var í eigu Byggðastofnunar en nú hefur fyrirtækið JS Seafood hleypt í það nýju lífi. Það er í eigu tveggja einstaklinga, Jóns Arnar Jakobssonar og Sarunas Raila frá Litháen. Í vinnslusal þar sem áður var pilluð rækja byrjuðu niðursuðudósir að rúlla af færibandi í sumar.

Í viðtali í fréttum Stöðvar 2 sagði Jón Örn að fyrirtækið sé þegar byrjað að sjóða niður þorskalifur og stefnt að því að bæta við hrognum og makríl á næsta ári. Þeir Jón Örn og Sarunas hafa áður komið að fiskvinnslu í Reykjavík og á Suðurnesjum en þegar spurt er hversvegna þeir velja Kópasker er svarið: Góð staðsetning gagnvart hráefnisöflun á Norðausturlandi.

Ljóst er að atvinnusköpun af þessari stærð hefur verulega þýðingu fyrir byggðina við Öxarfjörð. 

„Við erum með tíu manns í vinnu hérna núna. Við reiknum með að verða fimmtán manns. Í samfélagi sem er með um 200 manns búsetta er þetta talsverð viðbót,“ segir Jón Örn.

„Okkur hefur verið tekið vel. Það eru allir bara ánægðir með þetta framtak.“