Vilja auka ánægju með skólamáltíðir

Níu af hverjum tíu nemendum í grunnskólum Reykjavíkurborgar eru í mataráskrift, eða 12.168 börn og um 6.000 börn fá daglega máltíð úr mötuneytum leikskólanna. Þetta kemur fram á vef Rekjavíkurborgar.

„Kannanir hafa leitt í ljós að 80% foreldra leikskólabarna eru ánægð með matinn, en töluvert færri foreldrar eru ánægðir með matinn í grunnskólum, eða röskur helmingur."

Hjá Reykjavíkurborg er stefnt að því að auka ánægju grunnskólabarna og foreldra með matinn með markvissari hráefniskaupum og auknu gæðaeftirliti. Safn á þeim uppskriftum sem börnin eru ánægðust með og aðlaga þær að ráðleggingum um næringarsamsetningu, samkvæmt embætti Landlæknis. Þar að auki verður rafræn upplýsingamiðlun til foreldra um næringarsamsetningu máltíða efld. Nýtt umsjónarkerfi skólamötuneyta veitir foreldrum möguleika á að kynnna sér betur matseðla, en einnig verður það sameiginlegur gagnagrunnur þar sem yfirmenn mötuneyta geta haldið utan um samrænd hráefniskaup.

Á vefnum segir einnig að mánaðaráskrift að skólamáltíð kosti 6.600 krónur, en foreldrar fái 100% afslátt af áskrift fyrir þriðja barnið. Árið 2012 greiddi Reykjavíkurborg um 20 milljónir króna vegna systkynaafsláttar.