Útilokað að jörðin gleypi fólk á Íslandi

„Það er útilokað að jörðin opnist skyndilega hérna og gleypi eitthvað nema á jarðskjálftasvæðum ef menn eru óheppnir," segir jarðeðlisfræðingurinn Ari Trausti Guðmundsson.

Líkt og fjallað var um liðna helgi gleypti jörðin mann í Flórída-fylki í Bandaríkjunum um helgina. Ari Trausti var spurður að því í Reykjavík síðdegis hvort möguleiki væri á að slíkt gæti hent fólk hér á landi.

„Þetta tengist því hvers konar berggrunnur er á þessum stað á Flórída. Þetta er kalksteinn. Hann veðrast vegna jarðvatns sem að leikur um hann. Með tímanum verða til göng og hellar. Svo brotnar þakið á þessu og hrynur ofaní," segir Ari Trausti. Hann minnir á að atburðir sem þessir séu algengari en fólk geri sér líklega grein fyrir.

„Það hafa orðið meira en 500 svona stór og smá slys vegna svona atburða," segir Ari Trausti. Umræddur berggrunnur sé þó ekki til hér á landi. „Svona rof og veðrunarferli verða ekki yfirhöfuð á Íslandi. Því er útilokað að það opnist jarðföll eins og þarna."

Ari Trausti segir aðeins í jarðskjálfta gæti jörð opnast hér á landi. „Í Kröflueldunum í gamla daga fórust kindur í Öxarfirðinum sem voru á óheppilegum stöðum," segir Ari Trausti.

Hægt er að hlusta á viðtalið í heild sinni í spilaranum hér fyrir ofan.