Kassabílarallý í Fjölskyldugarðinum: "Við vonum bara að við fáum sem flesta krakka til að mæta"

Keppnin verður fyrsta kassabílarallý Bifreiðaíþróttaklúbbs Reykjavíkur. Keyrðar verða sex sérleiðir og verður keppnin sett upp eins og venjuleg rallýkeppni með tímatöku og öllu tilheyrandi. „Hugmyndin kviknaði þannig að ég á fimm ára dóttur sem er búin að keyra um á kassabílnum okkar og ég leitaði um allt að einhverri alvöru keppni til að senda hana í. Ég fann hana hvergi þannig að ég ákvað að búa hana til,“ segir Guðmundur Höskuldsson, keppnisstjóri.

Keppnin er aðallega ætluð börnum á aldrinum fjögurra til tólf ára en fullorðnir mega einnig vera með. Einn ökumaður þarf að vera í hverju liði og einn eða tveir sem ýta bílnum. „Við förum í gegnum öryggisskoðun og brautarskoðun og svo bara verður húllumhæ um daginn, keyrt á þremur leiðum, tekið hádegishlé og svo aftur þrjár leiðir. Bara alveg eins og alvörurallý. Við vonum bara að við fáum sem flesta krakka til að mæta og búum til flotta ökumenn,“ segir Pétur Pétursson, aðstoðarkeppnisstjóri.

Umgjörðin verður glæsileg. „Við erum með um það bil 25 starfsmenn sem mun starfa við keppnina og passa upp á að allt verði í lagi; dómarar, tímaverðir, flaggarar og svo framvegis,“ segir Guðmundur.

Leiðirnar krefjast mikils af þátttakendum. „Við erum með þrjár tegundir af brautum; þröngar og víðar, brekkur, undir brýr, yfir brýr og þetta býður upp á allt, eins og besta rallýkeppni bara,“ segir Pétur.

Skráningu lýkur 14.ágúst og allar upplýsingar má nálgast á síðunni kassabilarally.is. Þar eru líka leiðbeiningar um hvernig er hægt að smíða einfaldan kassabíl.

Í meðfylgjandi frétt má sjá Emmu Kristínu, dóttur Guðmundar og Jóhann Árna, frænda hans, sýna flotta takta á 22 ára gömlum kassabíl.