Innlent

Engin rannsókn hafin hjá Innanríkisráðuneytinu

Kjartan Hreinn Njálsson skrifar

Gögnin sem Snowden lak til fjölmiðla varpa ljósi á víðtækar persónunjósnir breskra og bandarískra yfirvalda og það hvernig erlendar njósnastofnanir fylgjast með gagnaflutningum í gegnum ljósleiðara til að vakta einstaklinga í gegnum netið. Innanríkisráðuneytið ætlar að hefja rannsókn á málinu og krefja bresk stjórnvöld um svör.

Tæplega hundrað prósent allra stafrænna gagna fljóta heimshornanna á milli í sæstrengjum. Hér nægir að benda á hinn íslenska Farice-1 sæstreng, sem er raunveruleg lífæð Íslands við hinn stafræna umheim.

Íslensk fjarskiptafyrirtæki fylgja regluverki Póst- og fjarskiptastofnunar um meðferð slíkra gagna innanlands, en það er hinsvegar erfitt að verja þessi gögn þegar komið er út fyrir landsteinanna.

Í gögnum sem Snowden lak til fjölmiðla á dögunum kemur fram hvernig breska leyniþjónustan hefur nýtt sé ljósleiðaratengingar við persónunjósnir.

Lekamálið teygir anga sína víða, þar á meðal hingað til lands enda hefur spurningarmerki verið sett við sjálft netöryggi landsins.

Samkvæmt heimildum úr Innanríkisráðuneytinu er rannsókn á uppljóstrunarmálinu komin stutt á veg. Engu að síður er fullur vilji af hálfu ráðuneytsins að taka málið fyrir af krafti.

Fyrstu skref rannsóknarinnar munu því taka til beiðni eða kröfu um skýringu á persónunjósnum breskra yfirvalda og hvort að þær taki til Íslands. Í kjölfarið verða fulltrúar Póst- og fjarskiptastofnunar kallaðir á fund ásamt fulltrúum frá Persónuvernd og Ríkislögreglustjóra.

Jafnframt mun sérstakur starfshópur um netöryggi fjalla um lekamálið, sem og öryggi netstrengja, ljósleiðaratenginga og fjarskiptavirkja landsins.

Málið verður tekið fyrir til umræðu á sumarþingi seinna í þessari viku. Þar verða málefni Snowdens rædd sem og netöryggi landsins.

En stóra spurningin er þessi: Hvað getur litla Íslands gert gagnvart njósnum breskra yfirvalda?

„Fólk getur sannarlega gert eitthvað til að verja sig," segir Smári McCarthy, pírati. „Til dæmis að dulkóða tölvupóstinn sinn eða nota VPN-tengingar. En síðan spurningin hvað stjórnvöld geta gert og það er í raun voðalega fátt. Þetta er vettvangur þar sem úrræði stjórnvalda eru takmörkuð. Þau gætu náttúrulega reynt að uppfræða fólk og kenna dulkóðun. Síðan er hin hliðin, að beita pólitískum þrýstingi á þau lönd sem við vitum að eru að njósna um okkur"

Óvíst er hver eftirköst persónunjósna Breta verða. Þó hefur Persónuvernd, tekið höndum saman við sambærilegar stofnanir í Evrópu og krafist svara frá Bretum og Bandaríkjamönnum.

Uppfært

Engin rannsókn hafin hjá Innanríkisráðuneytinu vegna meints uppljóstrunarmáls

Engin sérstök rannsókn hefur verið sett af stað vegna svokallaðs uppljóstrunarmáls hjá Innanríkisráðuneytinu. Innanríkisráðherra hefur heldur ekki beitt sér í málinu eða komið að því, eins og skilja hefði mátt af fréttum Stöðvar 2 í kvöld. Samkvæmt upplýsingum frá Innanríkisráðuneytinu nú í kvöld er almennt í gangi eftirlit með meðferð persónuupplýsinga og vegna netöryggis. 

Verkefni um netöryggi var sett á laggirnar á þessu ári og fjallar almennt um net og gagnaöryggi alveg óháð þessu máli. Engin ákvörðun hefur því verið tekin um að fara í sérstaka rannsókn vegna þessa máls, en fréttin í kvöld var þannig frekar um það sem myndi gerast ef á einhverjum tímapunkti kæmi til rannsóknar á umræddu máli eða einhverju álíka.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.