Maðurinn réðst á annan farþega

„Hann lét höggin dynja þangað til hann var festur niður," segir Jónas Már Torfason sem varð vitni að framferði mannsins um borð í vél Icelandair frá New York.

Eins og kom fram í fréttum Vísis í morgun þurfti að lenda vélinni í Kanada vegna þess að farþegi um borð lét öllum illum látum. Aðrir farþegar um borð þurftu að stökkva til þegar maðurinn réðist á annan farþega í vélinni til að halda honum niðri.

Jónas telur manninn hafa verið ölvaðan. „Hann var allavega ekki edrú."

Starfsfólkið í flugvélinni þurfti að tjóðra manninn niður með plasthandjárnum en það dugði ekki til. „Hann var síðan með svo mikil læti að það þurfti að snúa vélinni við og lenda í Kanada." Þarlend lögregluyfirvöld leiddu manninn svo úr flugvélinni, en hann mun ekki vera íslenskur ríkisborgari.

Jónas segir fólk hafa verið nokkuð skelkað vegna atviksins. „Það var eitthvað smá en starfsfólkið í flugvélinni höndlaði þetta mjög vel."

Vélinni seinkaði um þrjá tíma vegna atviksins en hún lenti um tíuleytið í morgun á Keflavíkurflugvelli.

Í samtali við fréttastofu sagði Guðjón Arngrímsson, upplýsingafulltrúa Icelandair, að maðurinn eigi líklegast við andleg veikindi að stríða. „Það kannski skýrir hegðunina að ekki fór milli mála að viðkomandi einstaklingur átti við einhvers konar andleg veikindi að stríða."