Kjálkafjarðarógnin kallar á breytingu vegarins

Vegagerðin neyðist til að endurhanna Vestfjarðaveg um skriðuna miklu sem féll í Kjálkafirði í vor. Fjarlægja þarf gríðarlegt efnismagn úr fjallshlíðinni til að draga úr þeirri ógn sem hún veldur vegfarendum.

Það var þann 23. apríl þegar starfsmenn Suðurverks voru að vinna að gerð nýs vegar sem 220 þúsund rúmmetrar af grjóturð hrundu niður fjallshlíðina og lokuðu veginum. Hrikaleg björg, sem sjá mátti í frétt Stöðvar 2 í kvöld, komu niður með skriðunni, 60-100 tonna steinar, að sögn Gísla Eysteinssonar, verkstjóra hjá Suðurverki.

Eftir að skriðan féll ákvað Vegagerðin að vakta svæðið, og lokaði veginum yfir nóttina og í rigningum. Gísli segir í fréttum Stöðvar 2 að ef það geri mikla rigningartíð séu menn mjög hræddir um að þetta geti farið af stað aftur. Um það geti þó enginn sagt með vissu.

Óvissan bitnar verst á íbúum á sunnanverðum Vestfjörðum. Eyrún Ingibjörg Sigþórsdóttir, oddviti Tálknafjarðar, segist treysta því, og vita það, að Vegagerðin í samráði við verktakann sé að skoða þetta og fylgist mjög vel með málum.

„Þetta kemur sér óneitanlega mjög óþægilega fyrir íbúana, atvinnufyrirtæki að ég tali nú ekki um ferðamenn," segir Eyrún.

Vegagerðin hefur nú gefið það út að framhlaupið sé stöðugt, ekki sé talin hætta á að það fari af stað en áfram verði fylgst grannt með. Hjá Vegagerðinni er jafnframt byrjað að endurhanna veginn á þessum kafla og segir Magnús Jóhannsson svæðisstjóri líklegt að niðurstaðan verði sú að legu hans verði breytt lítillega um leið og miklu af efni verði mokað úr skriðunni.