Katrín Aðalsteinsdóttir ól tvíburadætur sínar, þær Halldóru Gyðu og Þóru Margréti Halldórsdætur, í janúar. Þá hafði hún gengið með þær í einungis 25 vikur eða rúmlega sex mánuði. Meðganga tekur að jafnaði um 40 vikur eða um níu mánuði og því er ljóst að tvíburarnir voru fæddir um þremur mánuðum fyrir tímann.

Myndin er birt í tilefni af því að skýrsla Barnaheilla - Save The Children um nýbakaðar mæður kom út í dag. Í skýrslunni kemur fram að lífslíkur barna eru betri en víðast hvar annarsstaðar í heiminum. Það er meðal annars ástæða þess að Ísland er í 4. sæti á lista yfir þær þjóðir þar sem staða mæðra og barna fyrsta sólarhringinn eftir fæðingu er hvað best.

Þegar börn fæðast löngu fyrir tímann eru mörg af mikilvægustu líffærunum lítt þroskuð. Börnin þurfa því að vera löngum stundum í súrefniskassa á meðan þau eru að þroskast. Það var einmitt tilfellið með dætur Katrínar sem voru í súrefniskassa í 8 vikur en braggast nú vel.