Hjólin byrjuð að snúast hjá Jóni

Íslenski tónlistarmaðurinn Jón Jónsson er kominn inn á heimasíðu Epic Records. Plötufyrirtækið er eitt undirfyrirtækja útgáfurisans Sony. Þar er hann ekki í amalegum félagsskap, en undir listamannaflipanum á síðunni má finna stórstjörnur á borð við Jennifer Lopez, Avril Lavinge og Fionu Apple.L.A Reid er núverandi framkvæmdarstjóri Epic Records, en hann heillaðist af Jóni og gerði við hann plötusamning í haust. Jón flutti fimm lög fyrir L.A. Reid, en tónleikarnir fóru fram á skrifstofu tónlistarmógúlsins í 30 hæð í Sony-byggingunni á Madison Avenue á Manhattan. Þetta sagði Jón um tónleikana í viðtali í haust: "Ég hafði verið mjög stressaður vikuna fyrir þennan fund, svaf lítið og hugsaði mikið um hvaða lög ég ætti að taka. Svo þegar kom að þessu var ég furðu rólegur. Um tíu manns voru viðstaddir og L.A. Reid lék á alls oddi. Hann bað Kristján meðal annars um að spila Bítlana á flygilinn,“ segir Jón, sem náði einungis að leika lög sín When You're Around og Kiss in the Morning áður en útgáfustjórinn frægi stoppaði hann af. "Þá fórum við bara í annað herbergi á meðan þau réðu ráðum sínum inni á skrifstofunni. Bryant var á báðum áttum hvort það boðaði gott eða ekki að L.A. skyldi stöðva okkur eftir einungis tvö lög. Svo komu allir út og þökkuðu mér fyrir flutninginn, en síðastur kom L.A. Reid og sagði orðrétt "I want to carry you on my shoulders for the world to see.“" Jón sagði svo frá því í viðtali við Fréttablaðið fyrr í mánuðinum að ferlið hefði lengri tíma en hann reiknaði með. Nú eru hjólin greinilega byrjuð að snúast.

Jón er eins og vænta mætti í skýjunum yfir þessu og setti þessa mynd inn á Instagram fyrir helgi. Undir henni stóð. "Officially an Epic act. Feels good to be on the Epic website @Epic_Records #helloJLo #hiFiona."

.