Sænsk-íslensk snjóbrettastikla

Bræðurnir Einar og Viðar Stefánssynir frá Akureyri vinna nú að gerð snjóbrettamyndar sem þeir kalla „Throw It Down", en myndina vinna þeir í samvinnu við fjóra skólabræður sína í Svíþjóð.

„Þetta er svona snjóbretta- og íþróttamenntaskóli sem við erum í hér í Malung í Svíþjóð," segir Einar, en hann er nítján ára og eldri bróðir Viðars sem er sextán ára.

„Þetta kemur út á netinu í haust, svona þegar fólk verður farið að langa á bretti, og við erum bara að gera þetta til að leika okkur."

Sexmenningarnir hafa ferðast um Svíþjóð til að taka upp efni fyrir myndina, en hafa einnig tekið upp í nágrenni við skólann. „Skólinn er í svona fjallahverfi þar sem eru fimm skíðasvæði og einir bestu snjóbrettagarðar í Svíþjóð."

Í meðfylgjandi myndbandi má sjá stiklu Throw It Down.