Matinn á að gera frá grunni

Það er að koma betur og betur í ljós að við vitum ekki hvað við erum að setja ofan í okkur. Þetta mataræði gengur út á að gera hlutina frá grunni," segir einkaþjálfarinn Gunnar Már Kamban, en hann er höfundur bókarinnar „Lág kolvetna lífsstíllinn" sem kom í verslanir á dögunum.

Með bókinni vill Gunnar hjálpa fólki að grennast og líða betur.

Hann bendir á að í dag séu 24% Íslendinga þjökuð af offitu og að sex af hverjum tíu séu of þungir. „Það sem við viljum því gera er að takmarka þau kolvetni sem valda sykurþörf, aukinni matarlöngun og orkusveiflum. Uppistaðan í matnum á því að vera fitur og prótein," segir Gunnar.

Hann bendir á að ófremdarástand hafi skapast á mjög skömmum tíma í sambandi við ofþyngd, þrátt fyrir gríðarlegt framboð af hollum matsölustöðum. „Líkaminn flokkar ekkert endilega matinn eftir því hvort hann er hollur að óhollur. Hann tekur bara inn það sem við látum ofan í okkur og vinnur úr því. Ef viðbrögðin verða þau að líkaminn dælir inn insúlíni í blóðið er ekkert hægt að léttast," segir Gunnar.

Í bókinni er að finna þriggja vikna matseðil þar sem búið er að skipta deginum upp í morgunverð, hádegisverð og kvöldverð, en allt á að búa til frá grunni. „Þetta er svolítið eins og í gamla daga þegar enginn keypti unna eða tilbúna vöru. Dæmin hafa nú sýnt það upp á síðkastið að við vitum ekki mikið hvað við erum að borða," segir Gunnar, og bendir á hrossakjötshneykslið.

Hann segir að með þessu mataræði eigi fólk auðveldara með að léttast þar sem ekki þurfi að borða á 2-3 tíma fresti né þurfi að telja hitaeiningarnar ofan í sig. „Þetta snýst bara um að borða góðan mat eftir eigin tilfinningu."

Uppskrift úr bókinni:

Pizza með blómkálsbotni

Botninn

1 haus ferskt blómkál (soðið og maukað)

2 dl rifinn ostur

2 egg

2 pressaðir hvítlauksgeirar

2 tsk. salt

2 msk. möndlumjólk

1 msk. ólífuolía

Álegg

Eldaður kjúklingur, niðurrifinn

Grænt pestó

Fetaostur

Rauðlaukur

Salthnetur

Rifinn ostur

Blandaðu öllum hráefnum í botninn saman. Deigið er breitt út á smjörpappír á bökunarplötu.

Baka í 15-20 mínútur á 180°C. Taktu botninn út og bættu álegginu ofan á. Baka svo í 15-20 mínútur.