Kemur til greina að fresta öllum breytingum nema einni

Til greina kemur að fresta öllum breytingum á stjórnarskránni nema einni fram á næsta kjörtímabil. Þetta var meðal þess sem var rætt á fundi formanna stjórnmálaflokkanna á Alþingi í dag. Engin niðurstaða liggur þó fyrir en áfram verður fundað um málið á næstu dögum.

Formennirnir funduðu í tæpa eina og hálfa klukkustund í Alþingishúsinu í dag. Stjórnarflokkarnir hafa lýst því yfir að þeir vilji klára að minnsta kosti þrjár breytingar á stjórnarskránni á þessu kjörtímabili ef fresta á heildar endurskoðun

Það er ákvæði um auðlindir, þjóðaratkvæðagreiðslu og hið svokallaða breytingarákvæði - sem felur í sér að ekki þurfi lengur að rjúfa þing og boða til kosninga til að breyta stjórnarskrá.

Samkvæmt heimildum fréttastofu ræddu formennirnir þann möguleika að breyta einungis þessu breytingarákvæði og fresta öðru fram á næsta kjörtímabil.

Engin niðurstaða liggur þó fyrir en formennirnir voru bjartsýnir eftir fundinn í dag.

„Þetta var mjög góður fundur og það var almennur vilji til að vinna málið áfram með einhverjum hætti 2.20.44 hvernig tóku stjórnarandstaðan þínu sáttatilboði? Ja, menn eru tilbúnir að ræða það," sagði Árni Páll Árnason formaður Samfylkingarinnar.

Katrín Jakobsdóttir, formaður Vinstri grænna hafði þetta um málið að segja:

„Núna eru bara nokkrir dagar eftir að þinginu svoleiðis að tíminn er orðinn ansi naumur til að afgreiða ný mál vegna þess að það þarf að leggja fram ný mál sem þurfa að fara í gegnum allt ferlið. en það má lengi reyna og við sjáum hvað er hægt að gera," sagði Katrín.

„Við erum fyrst og fremst að tala um stöðu málsins. hvaða leiðir eru færar og fyrir okkur er það mjög mikilvægt að við sjáum einhvern endapunkt þannig að við getum lokið málinu á næsta kjörtímabili. það er það sem við erum að ræða. við erum líka að ræða þetta í samhengi almennt við hvernig við ljúkum þingstörfum hér í vor," segir Sigmundur Davíð Gunnlaugsson formaður Framsóknarflokksins.

Bjarni Benediktsson, formaður Sjálfstæðisflokksins, segir efnislegan ágreining mjög djúpan.

„Auðvitað er mjög efnislegur ágreiningur, mjög djúpur, um mörg atriði en það er spurning hvort hægt er að nota þann vilja sem birtist hjá öllum flokkunum um að skella ekki hurðum til að byggja með einhverjum hætti brú yfir á næsta kjörtímabil," segir Bjarni.

Þór Saari þingmaður Hreyfingarinnar ætlar að leggja fram vantraust á ríkisstjórnina ef fallið verður frá heildarendurskoðun á stjórnarskránni. Miðað við þessa stöðu bendir allt til þess að sú tillaga verði lögð fram á næstu dögum.