Reyndu að smygla tuttugu þúsund sígarettum til landsins

Tollgæslan lagði hald á tæplega hundrað karton af L&M sígarettum, sem reynt var að smygla hingað til lands í erlendu fiskiskipi síðastliðinn sunnudag.

Tollverðir komu auga á tvo skipverja þar sem þeir báru ferðatöskur í land og út fyrir hafnarsvæðið. Þegar mennirnir urðu varir við að þeim var veitt athygli köstuðu þeir töskunum frá sér og tóku til fótanna. Þeir voru stöðvaðir og játuðu þeir báðir að eiga töskurnar.

Þeir tjáðu tollvörðum að í töskunum væru sígarettur. Samkvæmt upplýsingum frá Tollgæslunni voru samtals 97 sígarettukarton í töskunum, eða tæplega tuttugu þúsund sígarettur. Málinu var lokið með upptöku varningsins og sektargerð.