Rikka gerir ekki upp á milli keppenda

Úrslitaþáttur MasterChef Ísland er á dagskrá Stöðvar 2 í kvöld og þá kemur í ljós hver verður fyrsti meistarakokkur Íslands. Þau Gunnar Helgi Guðjónsson, myndlistarmaður og kaffibarþjónn, og Jenný Rúnarsdóttir, starfsmaður hjá Te & Kaffi, keppa um þennan eftirsótta titil. Spennan verður rafmögnuð í kvöld að sögn Friðriku Hjördísar Geirsdóttur, dómara í MasterChef.

Lífið heyrði í Rikku sem er afar spennt fyrir kvöldinu.

Nú er komið að úrslitaþættinum í MasterChef Ísland. Hvernig finnst þér hafa tekist til við gerð þáttanna?

Það er alltaf áhætta fólgin í því að íslenska erlendar þáttaraðir, sérstaklega raunveruleikasjónvarp þar sem að ekki er alltaf hægt að leikstýra því sem gerist næst. Mér fannst virkilega vel að þessu staðið og þátturinn algerlega standa undir mínum væntingum.

Kom eitthvað á óvart við gerð þáttanna?

Ég er svo sem orðin nokkuð sjóuð á þessu sviði þannig að það var ekkert eitt sem að kom á óvart. Kannski helst hvað keppendurnir voru ólíkir og óhræddir við að opna sig.

Ég hafði mestar áhyggjur af því að keppendur myndu passa sig á því að sýna ekki of mikið af tilfinningum og væru kannski feimnir þar sem að þetta er frumraun þeirra í sjónvarpi.

Geturðu deilt einhverju eftirminnilegu atviki með lesendum Lífsins?

Mér fannst alveg hrikalega fyndið þegar Sigfús, einn af keppendunum, stal óvart humri úr Hagkaupum. Hann ætlaði að spara sér tíma og setti hann inn á sig til þess að þíða hann. Hann áttaði sig ekki á stöðunni fyrr en að hann var kominn út í bíl og þá skellti hann honum á miðstöðina og gaf í botn aftur upp í upptökuver. Það var mikið álag á blessuðum keppendunum, sérstaklega þegar leið á keppnina.

Hvernig kom ykkur dómurunum saman?

Alveg ljómandi vel, það var mikið hlegið og fíflast á bakvið tjöldin og stemningin létt. Við vorum þó alls ekki alltaf sammála og þá var nú stundum tekist aðeins á, en það er bara eins og gengur og gerist. Það hefði nú ekki verið spennandi hefðum við alltaf verið sammála.

Lærðir þú eitthvað í þessu ferli?

Já, maður lærir alltaf eitthvað nýtt. Mér fannst óskaplega gaman að kynnast þessu frábæra fólki sem tók þátt og verða fyrir áhrifum af eldamennsku þeirra og hugmyndum. Það er áhugavert að sjá hvernig fólk ber sig að í eldhúsinu sem hefur ekki farið í nám því tengdu.

Hvernig fannstu þig í þessu hlutverki dómara?

Mjög vel. Þegar við vorum að undirbúa verkefnið þá kom upp sú spurning hver okkar ætti að vera vondi dómarinn. Við ákváðum að ýta því bara til hliðar og vera við sjálf í því sem við værum að gera. Ég held að það sé alltaf farsælast. Það væri undarlegt ef að ég tæki upp á því að leika aðra manneskju en ég er.

Hverjir eru helstu kostir og gallar Gunnars Helga?

Gunnar Helgi getur verið helst til óöruggur og stressaður. Helsti kostur hans er hversu hugmyndaríkur hann er og nokkuð óhræddur að fara nýjar leiðir með hráefnið.

Hverjir eru helstu kostir og gallar Jennýjar?

Jenný er mjög fókuseruð, skipulögð og hefur einstaklega gott bragðskyn. En eins og Gunnar Helgi þá getur hún verið helst til stressuð, það er þó kannski ekki að undra svona miðað við álagið.

Við hverju mega áhorfendur Stöðvar 2 búast í kvöld?

Nú hefst einvígið á milli Gunnars Helga og Jennýjar þannig að spennan nær algjöru hámarki í kvöld og því má búast við rafmögnuðum þætti

Með hverjum heldur þú í kvöld?

Ég geri ekki upp á milli þeirra, þau eru bæði einstaklega hæfileikarík. En það gefur augaleið að annað þeirra hefur það sem þarf til að verða fyrsti Meistarakokkur Íslands.

Þú gætir unnið - vertu með okkur á Facebook.