Ákvörðun um áfrýjun liggur ekki fyrir

Engin ákvörðun hefur verið tekin um það hvort dómi Héraðsdóms Reykjaness yfir pilti á nítjánda ári, Dómald Degi Dómaldssyni, verði áfrýjað til Hæstaréttar. Hann var dæmdur í gær í fimm ára fangelsi fyrir tilraun til að myrða fyrrverandi ástkonu föður síns á heimili hennar.

Líkt og í máli gegn Guðgeiri Guðmundssyni, sem dæmdur var í Héraðsdómi Reykjavíkur og síðar í Hæstarétti fyrir árás á Skúla Sigurz, framkvæmdastjóra lagastoðar, var Dómald Dagur ákærður fyrir tilraun til manndráps á grundvelli 211. gr., sbr. 20. gr., almennra hegningarlaga nr. 19/1940. Guðgeir var dæmdur í fjórtán ára fangelsi fyrir brot sitt en Dómald Dagur í fimm ára fangelsi eins og fyrr segir.

Dómald er mun yngri en Guðgeir, hann er fæddur 1994 og var sautján ára þegar brotið var framið síðasta vor. Guðgeir er aftur á móti fæddur 1977 og var 34 ára þegar hann framdi sitt í mars í fyrra. Báðir voru sakhæfir og höfðu ekki hlotið dóma áður. Það er ekkert í dómunum sjálfum sem útskýrir sérstaklega hversu mikill munur er á þeim refsingum sem ákveðnar voru. Guðgeir gekkst við broti sínu fyrir dómi en Dómald Dagur játaði brotið við skýrslutöku hjá lögreglu og við þingfestingu í Héraðsdómi Reykjaness en neitaði svo þegar hann gaf skýrslu við aðalmeðferð málsins í dómi.

Í dómsniðurstöðu yfir Dómald Degi segir að sannað þyki að hann hafi stungið konuna. Með hliðsjón af þeim áverkum sem konan sem hann réðst á bar „verður ekki önnur ályktun dregin en að minnsta kosti á verknaðarstundu hafi atlagan verið unninn af ásetningi til að verða brotaþola að bana," eins og segir orðrétt. Einkum með hliðsjón af fjölda áverka og staðsetningu þeirra. Árásin hafi verið hrottaleg og tilefnislaus.

Í dómi Hæstaréttar í máli ákæruvaldsins gegn Guðgeiri Guðmundssyni segir að árásin hafi verið hrottaleg og lífshættuleg og leitt til varanlegs heilsutjóns brotaþola „og því að hending ein hafi ráðið að ekki hafi hlotist bani af," eins og segir í dómsniðurstöðunni. Fellst Hæstiréttur á það mat Héraðsdóms Reykjavíkur að Guðgeir hafi viljað að Skúli hlyti bana af atlögunni.