Á styrktarsamningi hjá Alien Workshop

Hjólabrettamaðurinn Sigurður Páll Pálsson er í aðalhlutverki myndbands sem bandaríski hjólabrettaframleiðandinn Alien Workshop sendi frá sér í dag.

Hinn tvítugi Sigurður er kominn með svokallað "flow sponsorship" hjá fyrirtækinu, og fær frían varning frá þessum virta brettaframleiðanda. Sigurður kynntist eiganda fyrirtækisins hér á landi fyrir þremur árum á Iceland Airwaves-hátíðinni.

„Mike Hill, sá sem á þetta og rekur, hann kom til Íslands 2010 og sá mig á bretti og ég spjallaði við hann og hann ákvað að gefa mér eitt bretti," segir Sigurður, og bætir því við að Alien Workshop sé eitt af virtustu fyrirtækjunum í brettabransanum.

„Það er í raun búið að breyta því hvernig fólk hélt að hjólabrettafyrirtæki gætu orðið."

Sigurður er ekki eini Íslendingurinn í samstarfi við Alien Workshop, en tónlistarmaðurinn Sindri Már Sigfússon, betur þekktur sem Sin Fang, hefur hannað útlit tveggja bretta fyrir fyrirtækið.