„Það er eitthvað við myndina sem minnir mig á afa"

"Auðvitað bregður manni að sjá svona mynd, ég viðurkenni það alveg," segir Kristín Þórðardóttir, barnabarn Bjarna Matthíasar Sigurðssonar sem hvarf á Snæfellsnesi árið 1974. Fjallað var um hvarf hans í þættinum Mannshvörf á Íslandi á Stöð 2 í gær.

Í dag hafði Jón Haukur Jóelsson, rafvirki á níræðisaldri, samband við fréttastofu og sagði frá því að hann hefði rekist á dularfulla ljósmynd frá því í fyrra. Myndin var tekin á Snæfellsnesi en þar var hann á ferðalagi ásamt vini sínum. Á myndinni sést mótað fyrir óþekktum fullorðnum karlmanni en þeir vinirnir kannast ekki við að einhver annar hafi verið með þeim í för.

Eftir að Jón Haukur sá þáttinn í gær varð honum hugsað til myndarinnar, sem tekin var í fyrra. Fjölskylda Bjarna Matthíasar hefur skoðað myndina í dag og hafa þau meira að segja stækkað hana upp.

En finnst þeim maðurinn á myndinni líkjast Bjarna Matthíasi? „Hann var alltaf með sixpensara og gleraugu. Það er samt erfitt að segja en þegar ég sá myndina þá brá mér - það er eitthvað við hana sem minnir mig á afa," segir hún.

Kristín segist ekki vera í neinum dulrænum málum og hafi í fyrstu haldið að einhver sé að leika sér að tilfinningum fjölskyldunnar „en ég talaði við ljósmyndarann í dag og hann var ósköp indæll og þægilegur." Fjölskyldan trúir því ekki að það hafi verið átt við myndina í myndvinnsluforriti enda sé ljósmyndarinn ekki með þekkingu í slíkt.

„Það sem sló mig mest í sambandi við þessa mynd er að móðir mín fór með draumspökum manni á þetta svæði fyrir mörgum árum, en sá maður sagði að afi væri þar," segir Kristín. „Mamma fór eftir öllu, þegar það var hringt í hana eftir drauma og annað slíkt."

Staðurinn sem myndin er tekin er töluvert frá þeim stað sem Bjarni Matthías týndist en Kristín segir hann hafa verið léttan á fæti og snöggur.

En hvernig tilfinning er að sjá myndina, núna mörgum árum frá hvarfi afa síns? „Þetta fær mann til að spekúlera hvað maður getur gert og kannski smá sjálfsásökun, að hafa ekki gert meira af því að fara um þetta svæði þegar maður hafði aldur og tíma til. Það koma margar spurningar upp í hugann þegar maður sér svona."

Á næstu vikum ætlar fjölskyldan að fara á svæðið, þar sem myndin var tekin á síðasta ári. „Mér finnst þetta svo ótrúlegt. Við vorum að hugsa um að fara þarna upp eftir og ganga um svæðið. Það sem vekur helst áhuga minn er þetta með mömmu og draumspaka manninn, það var á þessu svæði. Það verður ágætis gönguferð," segir hún að lokum.

Frétt Vísis frá því fyrr í dag.