Efnilegt klúður

Bíó, Þetta reddast

Leikstjórn: Börkur Gunnarsson

Leikarar: Björn Thors, Jón Páll Eyjólfsson, Maríanna Clara Lúthersdóttir, Guðrún María Bjarnadóttir, Ingvar E. Sigurðsson, Halldór Gylfason, Edda Björgvinsdóttir.



Björn Thors er hér í hlutverki blaðamanns sem fer ásamt ljósmyndara í Búrfellsvirkjun til þess að taka viðtal við stöðvarstjórann. Kærustur tvímenningana eru dregnar með í ferðina, sem hugsuð er sem vinnuferð með skemmtiívafi, en blaðamaðurinn hefur ekki nokkra stjórn á áfengisneyslu sinni og skandalíserar trekk í trekk.

Hugmyndin er góð og persónusköpunin til fyrirmyndar. Framkvæmdin er heldur síðri og áhorfandinn upplifir algjört stefnuleysi á köflum. Tilgangslausar senur eru dregnar á langinn og þegar upp er staðið virðist sem þarna hafi klukkutími verið teygður í einn og hálfan.

Þá er hálfgerður byrjendabragur á útliti myndarinnar en myndin er ekki nægilega skýr og klippingin misjöfn. Maður hugsar óneitanlega til hráleika Íslenska draumsins en í henni virkaði hann mun betur, enda kallaði heimildarmyndastíllinn beinlínis á hann. Hér er þetta truflandi en þó er ástæða til að hrósa ljómandi góðu hljóðinu.

Annað sem er ljómandi er leikhópurinn og hér stendur hver einasti leikari sig gríðarlega vel. Björn Thors ber af og persóna hans er aumkunarverð en virkilega sannfærandi. Aðrir leikarar eru einnig frábærir og gera nokkuð klúðurslega mynd að ágætri skemmtun. Börkur leikstjóri virðist þrælgóður í að stjórna leikurum og með aukinni vandvirkni á öðrum vígstöðvum er ég sannfærður um að næsta verk hans verður glæsilegt.

Niðurstaða: Stefnulaus en alls ekki vonlaus.