Með allt á hreinu á Þjóðhátíð

„Við eigum stórkostlegar og margar dásamlegar minningar frá þessum stað," segir Jakob Frímann Magnússon.

Hljómsveitin Stuðmenn spilar á Þjóðhátíð í Eyjum um verslunarmannahelgina. Þangað mætir hún til leiks með sömu tónleika og hún flutti í Hörpunni í október í fyrra undir yfirskriftinni Með allt á hreinu. Þá voru liðin þrjátíu ár frá gerð kvikmyndarinnar ástsælu, sem var einmitt að hluta til tekin upp á Þjóðhátíð í Eyjum.

„Það er tilhlökkunarefni að fara þangað aftur og máta sig við þetta nýja glæsisvið sem þarna hefur verið reist og alla þá umgjörð sem var fyrr á árum mjög ólík því háþróaða fíneríi sem nú er í boði," segir Jakob Frímann, en hljómsveitin spilaði þar síðast 2006. „Þetta er sennilega sú útihátíð sem á sér hvað lengstu og merkustu sögu sem samfelldur vettvangur jöfragleði í Norður-Evrópu."

Retro Stefson hefur einnig verið bókuð á Þjóðhátíð og verður þetta í fyrsta sinn sem hljómsveitin stígur þar á svið. „Það má segja að hamraborg Heimaeyjar verði helguð Hamrahlíðarhljómsveitunum Stuðmönnum og Retro Stefson. Það er engin ástæða til að harma það."

Forsala miða á hátíðina hefst í dag á Dalurinn.is og er miðaverð 16.900 kr. Fólk getur greiðsludreift miðaverðinu vaxtalaust á fjóra mánuði. Fullt verð við hliðið í Eyjum er 18.900 kr. Salan í Herjólf fyrir Þjóhátíð er einnig að hefjast í dag.