Úrslitin í Masterchef ráðast í kvöld

Tveir keppendur keppast um að verða fyrsti meistarakokkur Íslands í Masterchef á Stöð 2 í kvöld. Gunnar Helgi Guðjónsson og Jenný Rúnarsdóttir glíma við þrjár þrautir í úrslitaþættinum og er andrúmsloftið í Meistaraeldhúsinu vægast sagt spennuþrungið. Fyrsta þrautin felst í því að búa til hið fullkomna Crème brûlée. Önnur þrautin heitir Þekkirðu bragðið? og fær sigurvegarinn þrjár auka mínútur í matarbúrinu. Þriðja og síðasta þrautin er álagspróf þar sem keppendur fá tvo tíma til að bera fram forrétt og þurfa svo að bera fram aðalrétt tíu mínútum síðar og eftirrétt tíu mínútum eftir það. Gunnar Helgi er kaffibarþjónn og myndlistamaðurinn sem elskar að baka brauð og myndi skíra veitingastaðinn sinn Eftirréttamiðstöðina? Jenný er starfsmaður Te og kaffi, sem elskar ítalska matargerð og segir krókódíl skrýtnasta matinn sem hún hafi smakkað? Það kemur eflaust ekki mörgum á óvart sem fylgst hafa með þáttunum að þau skuli há lokabaráttuna í MasterChef Ísland. Þau hafa bæði sýnt styrkleika sína á sviði eldamennsku svo um munar. En einungis annað þeirra getur orðið fyrsti meistarakokkur Íslands. Sigurvegarinn hlýtur að launum eina milljón króna og glæsilegan ísskáp. Einnig fær hann að hanna sinn eigin matseðil á veitingastað í Reykjavík og gefa út matreiðslubók. Dómnefnd þáttarins skipa, sem fyrr, Friðrika Hjördís Geirsdóttir, sjónvarpskokkur, Eyþór Rúnarsson, yfirmatreiðslumaður á Nauthól og Ólafur Örn Ólafsson, yfirþjónn á Hótel Marina.