„Þetta er mjög einfalt. Við ætlum okkur áfram“

„Við sýndum að við getum alveg léttilega unnið þá ef við spilum vel, ellefu á móti ellefu,“ segir miðvörðurinn Ragnar Sigurðsson.

Ragnar var mættur klukkan ellefu að staðartíma á Maksimir-leikvanginn í Zagreb þar sem æfing liðsins stendur nú yfir. Ragnar segir ljóst að ef annað liðið standi betur að vígi eftir fyrri leikinn, sem lauk með markalausu jafntefli í Laugardalnum, þá séu það okkar menn.

Íslenska liðið saknar Kolbeins Sigþórssonar í leiknum annað kvöld. Framherjinn meiddist á ökkla í fyrri leiknum en sem betur fer virðast meiðslin þó ekki jafn alvarleg og óttast var í fyrstu.

„Það er hrikalegt að Kolli geti ekki verið með því hann er okkar markahæsti maður. En þú sérð alla sóknarmennina sem við erum með. Þetta verður ekkert mál.“

Ragnar hafði góðar gætur á Mario Mandzukic í fyrri leiknum. Framherji Bæjara komst lítt áleiðis í baráttunni við Árbæinginn.

„Það var auðvitað ekki bara ég. Við gerðum það allir saman. Við ætlum að sjálfsögðu að gera það aftur. Varnarleikurinn hefru verið góður í síðustu leikjum og við verðum að ná því aftur á morgun.“

Ragnar hefur ekki áhyggjur af því að stress geri vart við sig á morgun. Menn séu vanir stórum leikjum og spili þá í hverri viku.

„Það eru margir úrslitaleikir sem maður hefur spilað. Jafnvel þó þeir séu bara í Skandinavíu þá eru taugar í spilinu. Og að vera með mann eins og Eið sem er búinn að vera úti um allt, Gylfi og Aron spila á Englandi. Við erum með hörkulið og þurfum ekki að vera hræddir við neitt. Við ætlum okkur áfram. Það er hrikalega einfalt.“

Ragnar telur að liðið græði mikið á því að hafa leikmann eins og Eið Smára innanborðs í leikjum sem þessum.

„Reynslan hjá Eiði skiptir miklu máli. Hvernig hann getur haldið boltanum í erfiðum aðstæðum inni á vellinum. Það eru ekki margir sem geta það. Það eru hann og Kolli kannski aðallega þarna frammi. Þetta skiptir miklu máli að hafa svona mikinn karakter inni á vellinum.“