"Að koma Íslandi á HM væri sérstakt afrek“

Landsliðsþjálfarinn Lars Lagerbäck var spurður að því á fundi með blaðamönnum í dag hvort það yrði hans glæsilegasta afrek að koma Íslandi á HM.

Svíinn kom Svíum á fimm stórmót í röð auk þess að stýra Nígeríu í lokakeppni HM 2010. Nú gæti hann verið maðurinn í brúnni sem afrekar það að koma Íslandi í lokakeppni heimsmeistaramóts. Ísland yrði fámennasta þjóðin til að ná því til þessa.

„Besta svarið er að það yrði sérstakt afrek. Að koma til Ísland og vinna að þessu með Heimi (Hallgrímssyni) og öðru starfsfólki í kringum svo lítið lið sem fáir reiknuðu með að gæti gert svo góða hluti.“

„Þegar kemur að tilfinningum þá er það alltaf góð tilfinning að tryggja lið inn á stórmót. Að fara á HM eða EM er alltaf stórt afrek og það besta sem þú getur upplifað sem þjálfari, leikmaður og fjölmiðlafulltrúi,“ sagði Svínn. Við hlið hans sat Ómar Smára, fjölmiðlafulltrúi KSÍ.