Aron Einar: Staðráðnir í að gera vel fyrir Ísland

„Stemmningin er góð og staðan á mönnum fín. Menn eru að reyna að koma líkamanum saman. Þetta er þungt eftir leik, það var mikið hlaupið manni færri. Það stendur kannski aðeins í okkur en við erum vanir þessu.“

Aron Einar Gunnarsson, fyrirliði karlalandsliðsins, segir sína menn klára í slaginn fyrir leikinn gegn Krótöum annað kvöld. Aron var í góðum gír fyrir æfingu liðsins í Zagreb í dag.

„Möguleikarnir eru fínir. Þeir segjast spila öðruvísi á heimavelli en við bara mætum þeim eins og við gerðum á föstudaginn. Við spilum góðan varnarleik og fáum okkar færi. Við þurfum bara að nýta þau og þá veit maður aldrei hvað gerist,“ segir Aron Einar.

„Ef við náum þessu útivallarmarki þá er aldrei að vita.“

Aron Einar segir sína menn klára í slaginn þótt mikið sé undir.

„Við erum allir að spila um hverja helgi fyrir framan ég veit ekki hvað marga áhorfendur. Menn eru klárir í það. Pressan er kannski öðruvísi því það er mikið í húfi en það er líka mikið í húfi fyrir þá,“ segir Aron Einar.

Landsliðsfyrirliðinn minnir á að áhuginn hér úti fyrir leiknum sé ekki jafnmikill hjá króatísku þjóðinni og þeirri íslensku.

„Eiga þeir ekki í einhverjum erfiðleikum með að selja þennan miða á leikinn? Það verður kannski ekkert fullt af áhorfendur að styðja við bakið á þeim. Ef við náum að halda þeim í skefjum, þá verða þeir kannski pirraðir.“