Sorg í Portúgal rétt fyrir Svíaleikinn

Portúgal og Svíþjóð spila í Svíþjóð á morgun seinni umspilsleik sinn um laust sæti á HM í Brasilíu næsta sumar en Portúgalar hafa 1-0 forskot frá fyrri leiknum í Portúgal.

Portúgalska þjóðin glímir við sorg tengdri fótbolta í aðdraganda leiksins því hinn tvítugi knattspyrnumaður Alex Marques lést í miðjum leik í gær eftir að hafa fengið hjartaáfall.

Alex Marques var áður í herbúðum Porto en var þarna að spila með C-deildarliðinu Tourizense í deildarleik á móti Carapinhense. Leikurinn var aðeins sjö mínútna gamall þegar hann féll í grasið og lífgunartilraunir báru engan árangur. Þetta er ekki í fyrsta sinn sem leikmaður Tourizense fær hjartaáfall.

„Allt portúgalska landsliðið vill senda fjölskyldu hans samúðarkveðju," sagði Fernando Gomes, forseti portúgalska knattspyrnusambandsins í viðtali við Sapo Desporto.

Á heimasíðu sambandsins kemur líka fram að Cristiano Ronaldo og félagar í portúgalska hópnum séu í sjokki yfir þessum sorglegu fréttum frá heimalandinu.

Svíar taka á móti Portúgal á Friends Arena í Stokkhólmi annað kvöld en ekki er enn ákveðið hvort portúgalska liðið muni minnast Alex Marques í tengslum við leikinn.