Málar fyrir gott málefni

Það muna eflaust margir eftir því þegar Selfossmærin Erna Kristín Stefánsdóttir lét raka af sér allt hárið og safnaði þannig peningum fyrir SOS barnaþorpin. Erna lætur ekki þar við sitja heldur safnar nú í annað sinn fyrir sama málefni með því að mála myndir og selja.

Hvað ert þú búin að vera að bralla síðan þú rakaðir af þér hárið í vor?

Ég er búin að vera í námi hjá Myndlistaskóla Reykjavíkur og stefni á nám í myndlist í Listaháskólanum í framhaldi af því. Ég er líka búin að vera að fikra mig áfram með myndavélina og hef verið að taka að mér ýmis verkefni tengd ljósmyndum. Ég er einmitt að vinna í skemmtilegu verkefni núna og hef fengið til liðs við mig landsþekkta tónlistarmenn, Unnstein úr Retro Stefson, Bassa úr Kiryama Family, Pétur Ben og fleiri. Það er hægt að fylgjast með þessu öllu saman á facebooksíðunni minni, Stín ART.

Hvernig kviknaði hugmyndin að þessari söfnun?

Hún kom út frá svokölluðum stencil myndum sem ég hef verið að gera til þess að borga skólagjöldin, geta keypt striga, málningu og fleira. Myndirnar urðu svo ótrúlega vinsælar að ég hugsaði með mér að ég yrði nú ekki lengi að ná upp í góða upphæð til að styrkja SOS barnaþorpin aftur.

Hvaða myndir eru vinsælastar og hvað kosta þær?

Myndir sem ég mála af hinum ýmsu átrúnaðargoðum eru vinsælastar, Bítlarnir, Marilyn Monroe, Audrey Hepburn, Rolling Stones, Jimi Hendrix og fleiri. Fólk hefur líka verið að biðja mig um að teikna tilteknar Hollywoodstjörnur og jafnvel fjölskyldumyndir. Verðið á myndunum er misjafnt en t.d. kostar 60 x 80 mynd af Marilyn Monroe 15 þúsund krónur og af því renna 5 þúsund til SOS.

Það virðist vera að þú látir mikið af þínum peningum renna til þessa málefnis. Langar þig ekkert í nýja skó eða utanlandsferð?

Jú, auðvitað. En mér finnst börnin bara þurfa meira á peningunum að halda en ég, svona upphæðir muna öllu fyrir þau. Mér finnst nauðsynlegt að vekja fólk til umhugsunar. Ég er búin að frétta af sex stelpum sem rökuðu af sér hárið fyrir gott málefni eftir að ég gerði það í fyrra og er alveg í skýjunum yfir því.

Þeir sem vilja kaupa fallegar stencil myndir af Ernu og styrkja í leiðinni gott málefni geta gert það hér.