Heimir: Hefði endað illa hefði ég tekið við liðinu 2011

„Þetta hefur verið mikið lærdómsferli fyrir mig. Ef ég á að vera alveg hreinskilinn taldi ég mig geta tekið við þessu landsliði haustið 2011,“ sagði Heimir Hallgrímsson á blaðamannafundi í Laugardalnum í dag.

Heimir var kynntur til sögunnar sem annar tveggja þjálfara karlalandsliðsins fram yfir EM 2016. Í kjölfarið verður hann aðalþjálfari liðsins í undankeppni HM 2018. Hann segir ljóst, eftir síðustu tvö ár, að það var gott að hann tók ekki við liðinu fyrir tveimur árum.

„Ég sé sjálfur núna að það hefði aldrei gengið. Ég hefði haldið áfram að þjálfa landsliðið eins og ÍBV. Það hefði alltaf endað illa,“ segir Heimir. Hann kann að meta það sem hann hefur lært af Svíanum.

„Að kunna að vinna með atvinnumenn er eitthvað sem við áhugaþjálfararnir erum ekki vanir að gera,“ segir Heimir. Hann minnir á að hann þekki ekki það umhverfi, ekki frekar en umhverfi landsliðsins enda spilaði hann enga landsleiki á sínum tíma.

„Ég hef lært margt á þessum tveimur árum og mun læra mikið á þeim næstu tveimur,“ segir Heimir. Hann segir að það fari varla framhjá neinum hvernig persóna Svíinn sé.

„Hann er auðmjúkur og gefur mikið af sér. Hann hefur alltaf látið mér líða vel og finnast ég vera svaka merkilegur,“ sagði Eyjapeyinn.