Stúdentar greiði fyrir niðurskurð háskólans

„Stúdentar eiga að greiða fyrir niðurskurð Háskóla Íslands.“ Þetta segir formaður stúdentaráðs. Menntamálaráðherra segir að hækkun skrásetningagjalda auðvelda háskólanum að takast á við niðurskurð.

Skrásetningagjald í Háskóla Íslands mun á næsta ári hafa hækkað um 67% á þremur árum. Þau voru hækkuð úr 45 í 60 þúsund krónur á síðasta ári og munu hækka í 75 þúsund krónur á næsta ári. Niðurskurður blasir við Háskóla Íslands sjötta árið í röð og eru stúdentar uggandi yfir því að skrásetningagjaldið sé notað til að brúa bilið í niðurskurði.

María Rut Kristinsdóttir, formaður Stúdentaráðs, segir hækkun skrásetningagjalda, koma sér illa við stúdenta en verst sé þó að hækkunin muni ekki skila sér inn í háskólann. Stúdentar eigi að borga upp niðurskurð við skólann.

„Staðreyndin er einfaldlega sú að samkvæmt reikningum þá eiga að koma u.þ.b. 140 milljónir inn í háskólann með hækkun skrásetningagjaldsins. Hins vegar munu aðeins um 39 milljónir skila sér inn í háskólann. Restin fer til þess að mæta niðurskurði á framlagi frá ríkissjóði,“ segir María Rut. Munu nemendur þá borga fyrir þann niðurskurð sem framundan er?

„Mér sýnist það eiga að vera leiðin. Stúdentar eiga að greiða fyrir þetta. Maður veltir því fyrir sér hvort að skrásetningagjald sé orðið að skólagjaldi. Þjónustugjöld eiga að vera þannig að þau renni í þá þjónustu sem þau borga fyrir. Miðað við þetta þá er hækkun þessara gjalda ekki að fara að skila sér í betri þjónustu fyrir stúdenta,“ bætir María Rut við.

Niðurstaðan hefði orðið sú sama

Illugi Gunnarsson menntamálaráðherra segir að ákvörðun um hækkun skrásetningagjaldsins sé tekin með hliðsjón af ráðgefandi upplýsingum frá háskólunum og í takt við vísitölu neysluverðs.

„Ég tel það vera prinsipp ákvörðun að háskólarnir eigi að meta það hver innritunarkostnaðurinn er. Hvort sem að það hefði verið um að ræða niðurskurð eða aukningu á fjármagni til háskólans þá hefði niðurstaða mín orðið sú sama. Aðalatriðið er það að háskólinn getur aukið tekjur sínar og þarf ekki að nota framlag frá ríkinu til að greiða niður þennan þátt síns reksturs. Háskólinn fær inn þessa fjármuni og ríkið nær fram sínum aðhaldsmarkmiðum.“