Reykræst í Hellisheiðarvirkjun - fasi brann yfir

Nokkur reykur myndaðist þegar einn fasi af þremur í rafstreng við eina af sjö aflvélum Hellisheiðarvirkjunar brann yfir í morgun.

Slökkvilið í Árnessýslu var kallað á staðinn og reykræsti vélasal virkjunarinnar. Engin meiðsl urðu á fólki.

Vélinni sló út og sömuleiðis annarri við hliðina en þær eru með samtvinnaða tengingu við Landsnet.

Starfsfólk Orkuveitunnar vinnur að því að koma vélunum af stað að nýju. Vonast er til að önnur verði farin að framleiða rafmagn fyrir kvöld.

Vélin sem varð fyrir tjóni þarfnast hins vegar ítarlegrar skoðunar áður en hún verður gangsett.