Byrjendalæsið er skemmtilegra fyrir kennara og nemendur

Ný aðferð í lestrarkennslu ungra barna hefur smám saman verið að skjóta rótum í menntakerfi landsins. Kennarar segja að aðferðin hafi góð áhrif á lesskilning ungra barna.

Kennsla í grunnskólum landsins hefst í næstu viku þegar þúsundir barna setjast á skólabekk. Á síðustu dögum hafa kennarar í ýmsum skólum verið að læra nýja aðferð til að kenna ungum börnum lestur. Aðferðin nefnist Byrjendalæsi og hefur verið að ryðja sér til rúms í skólastarfi á landinu. Nú er svo komið að yfir 70 grunnskólar af þeim 174 sem starfa á landinu styðjast við aðferðina og alltaf bætast fleiri í hópinn.

Með aðferðinni er reynt að setja skilning ungra barna í forgrunn í lestrarkennslu í stað þess að einblína á lestrartækni og hraðan lestur. Kennsluaðferðin byggir á þremur þrepum.

„Við byrjum alltaf á heildinni. Þá er saga lesin eða eitthvað sem börnin hafa áhuga á og þau velja til að vinna með. Sagan er lesin, orð eru rædd sem eru skemmtileg og þannig kynnast allir efninu," segir Jenný Gunnbjörnsdóttir hjá Miðstöð skólaþróunar við Háskólann á Akureyri.

Þannig er tryggt að allir skilji viðfangsefnið áður en kafað er í lestrartækni og bókstafir kynntir til sögunnar sem gerist í næsta þrepi.

„Þá er verið að vinna með stök orð sem kannski eru tekin niður, skoðaðir stafir og hljóð eða merking orðanna skoðuð," segir Jenný.

Að lokum er svo reynt að byggja á textanum og skapa nýjar hugmyndir eða texta og þroska þannig hinn nýfengna lærdóm. Á undanförnum árum hefur verið unnið út frá aðferðinni í mörgum skólum landsins.

„Þetta er svo miklu miklu skemmtilegra, bæði fyrir kennarann og fyrir börnin. Árangursríkara. Ég sé meiri framfarir á styttri tíma hjá öllum," segir Elín Stephensen, kennari í Vættaskóla.

Elín er sannfærð um að þessi nýja aðferð hafi jákvæð áhrif á lesskilning ungra barna, en minnkandi lesskilningur í samfélaginu hefur mikið verið í umræðunni að undanförnu.

„Ég trúi því. Við erum markvisst að kenna þeim aðferðir til að skilja texta betur," segir hún og segist strax finna fyrir breytingum eftir að aðferðin var tekin upp í Vættaskóla en þar hefur orðið vart við aukin útlán á skólabókasafninu. „Börnin eru líka öðruvísi viðskiptavinir á bókasafninu. Þau gera meiri kröfur og taka öðruvísi bækur, oft eftir ákveðna höfunda," segir hún. Börnin virðist því vera að lesa sér til gagns og skemmtunar í meira mæli.