Unglingar til varnar

Kvikmyndin Red Dawn segir frá hópi unglinga sem snýst til varnar og berst gegn her Norður-Kóreumanna sem hefur gert innrás í heimabæ þeirra.

Spennumyndin Red Dawn verður frumsýnd í kvöld. Myndin er byggð á samnefndri kvikmynd frá árinu 1984 sem skartaði Charlie Sheen og Patrick Swayze í aðalhlutverkum.

Red Dawn segir frá smábænum Spokane í Bandaríkjunum sem einn góðan veðurdag er hertekinn af norðurkóreska hernum. Hópur skólakrakka ásamt fyrrverandi landgönguliða ákveða að taka höndum saman og berjast gegn innrásarhernum og frelsa heimabæinn undan oki hans. Hugmyndin er vægast sagt ótrúleg, enda ólíklegt að fámennur hópur unglinga eigi roð í vel þjálfaðan og tæknivæddan her. Hér er því komin enn ein myndin sem fjallar um föðurlandsástina og hvers hún er megnug þegar Bandaríkin standa frammi fyrir utanaðkomandi ógn.

Chris Hemsworth og Josh Peck fara með hlutverk bræðranna Jeds og Matts Eckhert sem leiða skæruliðahópinn The Wolverines (nafnið er dregið af fótboltaliði skólans í bænum). Með önnur hlutverk fara Isabel Lucas, Josh Hutcherson, Adrianne Palicki og Connor Cruise, en sá síðastnefndi er sonur leikarans Tom Cruise og stígur hér sín fyrstu skref í kvikmyndaleik. Leikstjóri myndarinnar er Dan Bradley og er Red Dawn frumraun hans sem leikstjóra. Bradley starfaði áður við að samstilla áhættuatriði fyrir kvikmyndir á borð við Independence Day, Spider-Man, The Bourne Supremacy, Where The Wild Things Are, Quantum of Solace og Mission: Impossible – Ghost Protocol.

Hasaratriðin og tæknibrellurnar fá mikið vægi í Red Dawn og að mati margra er það gert á kostnað persónusköpunarinnar. Nokkrir gagnrýnendur segja myndina eiga margt sameiginlegt með verkum Michaels Bay, sem leikstýrði meðal annars Transformers myndunum. Mikið er um hasar, hlaup, sprengingar og átök, en minna um góð samtöl eða persónusköpun. Myndin fær hroðalega dóma frá gagnrýnendum sem gefa henni ekki nema 11 prósent á Rottentomatoes.com. Áhorfendur eru ekki jafn dómharðir og gefa henni sextíu prósent.