Handboltajól hjá Þorsteini J.

Þorsteinn J. undirbýr þáttinn Ísland á HM 2013 sem verður sýndur um jólin.

„Þetta verða handboltajól,“ segir sjónvarpsmaðurinn Þorsteinn J. Vilhjálmsson.

Hann er nýkominn heim frá Þýskalandi þar sem hann tók handboltaviðtöl fyrir þáttinn Ísland á HM 2013 sem verður sýndur á Stöð 2 Sport á jóladag og á Stöð 2 á milli jóla og nýárs.

Í Berlín talaði hann við Dag Sigurðsson, þjálfara Füchse Berlín, og spænska landsliðsmanninn Iker Romero sem leikur með liðinu. Í Kiel talaði Þorsteinn við þjálfarann Alfreð Gíslason og landsliðsmennina Guðjón Val Sigurðsson og Aron Pálmarsson.

„Ég var að taka stöðuna fyrir þetta mót í janúar. Það er nýtt mót, nýr þjálfari og helsti leikmaðurinn [Ólafur Stefánsson] er hættur. Við bætum svo við viðtali sem Guðjón Guðmundsson átti við Aron Kristjánsson landsliðsþjálfara,“ segir Þorsteinn, sem segir Íslendingana hóflega bjartsýna fyrir heimsmeistaramótið. „Eins og Dagur sagði þá getum við verið í efstu fimm eða efstu átta sætunum og hvort tveggja er fínt. Þarna verður öðruvísi fyrirkomulag. Það er venjuleg riðlakeppni þar sem efstu fjögur liðin fara upp en síðan eru þetta hreinir úrslitaleikir. Ekki milliriðlar eins og var. Þetta verður miklu skemmtilegra.“

HM í handbolta byrjar ellefta janúar og þar verður Þorsteinn, eins og oft áður, í settinu hér heima ásamt Geir Sveinssyni og Guðjóni Guðmundssyni. - fb