Hannes eyðir kosningadeginum í Skagafirði

„Þetta leggst ljómandi vel í mig," svarar Hannes Bjarnason forsetaframbjóðandi, sem eyðir kosningdeginum í Skagafirði ásamt fjölskyldu sinni í dag. Þar mun hann einnig kjósa og í kvöld mun hann halda kosningavöku í Miðgarði í Varmahlíð. Hannes er ættaður frá Skagafirði en hefur, eins og kunnugt er, verið búsettur í Noregi síðastliðin ár.

Spurður hvað hann ætli að gera í dag svarar hann: „Ætli við tökum það ekki bara rólega og hugsum um börnin okkar. Þau hafa verið hjá ömmu sinni alla vikuna."

Spurður hvort hann hafi velt úrslitum kosninganna eitthvað fyrir sér, svara Hannes að hann voni að hann hækki eitthvað, en fylgi hans hefur mælst um eitt prósent í síðustu könnunum. Hannes segist hafa fundið fyrir miklum meðbyr síðustu vikurnar, „og ég held hreinlega að mitt stuðningsfólk séu ekki þeir sem hrópa hæst, en það verður gaman að sjá hvernig þetta fer að lokum."

Aðspurður hvort eitthvað hafi vakið athygli hans, eftir að hafa verið svo lengi í Noregi, enda gests augað glöggt, svarar Hannes að hann hafi hitt mikið af fólki á ferðum sínum um landið undanfarnar vikur. Og meðal annars eitt vakið athygli hans, „það eru allir að tala um uppgjör eftir hrun, þeir tala um gagnsæi í þjóðfélaginu, svo þegar á hólminn er komið er fólk ekkert sérstaklega upptekið af því að gera upp eftir hrun."

Hannes segir þetta meðal annars kristallast í skörpum átakalínum, þá helst á milli Þóru Arnórsdóttur og Ólafs Ragnars Grímssonar. Spurður hvort það geri Þóru sérstaklega pólitíska þó stuðningsmenn hennar séu það, svara Hannes: „Það er allt í lagi að það séu flokkadrættir. Hún hefði kannski bara átt að viðurkenna það, í staðinn fyrir að fara undan í flæmingi."

Spurður hvað hann ætli að gera á morgun, það er að segja verði hann ekki kjörinn sem forseti, segir Hannes að við taki sumarfrí. Svo mun hann halda aftur til Noregs, þar sem börnin hans úr fyrra hjónabandi eru búsett.