Mikil aðsókn í Glee-klúbb

„Það er aldrei nóg af söng og gleði,“ segir Sigurgeir Ingi Þorkelsson, varaforseti nemendafélags Menntaskólans við Hamrahlíð og einn forsprakka nýstofnaðs Glee-klúbbs í skólanum.

Klúbburinn er að fyrirmynd bandarísku sjónvarpsþáttana Glee sem fjalla um hóp ungs fólk í menntaskóla sem sameinast í söng og dansi. Í kjölfar vinsælda þáttana hafa Glee-klúbbar sprottið upp út um allan heim, en Sigurgeir er þess fullviss að þessi sé sá fyrsti hér á landi.

Hugmyndin að klúbbnum kviknaði í tengslum við kosningarbaráttu núverandi forseta nemendafélagsins, Hjalta Vigfússonar, í vor. Sigurgeir gengur svo langt að fullyrða að kosningarloforð Hjalta um stofnun Glee-klúbbs innan veggja MH hafi tryggt honum sigurinn. „Fyrst var hugmyndin sett fram meira í gríni en alvöru, en vegna fjölda áskoranna var ákveðið að hrinda henni í framkvæmd. Yfir hundrað manns hafa boðað koma sína á fyrsta fundinn,“ segir Sigurgeir, en téður stofnfundur verður haldinn í dag klukkan hálf fjögur. „Ég auglýsi eftir íslensku nafni á klúbbinn. Hugsanlega gæti hann heitið Gleði-klúbburinn,“ veltir Sigurgeir fyrir sér.

Hann hvetur nemendur annarra menntaskóla til að fara að þessu fordæmi og stofna Glee-klúbb. Þá sér hann fyrir sé svokallaða Glee-keppni milli skólanna í framtíðinni. „Við erum svo heppin að hafa góðan aðgang að listafólki hér í MH. Hér er listdansbraut og mikið af hæfileikaríku tónlistarfólki. Við höfum í það minnsta efniviðinn í þetta og það væri gaman að skora aðra skóla á hólm.“

Í sjónvarpsþáttunum bresta meðlimir klúbbsins í söng í tíma og ótíma en Sigurgeir er ekki viss um að sú verði rauninn hjá MH-ingunum. „Nei, ég held að við einbeitum okkar að því að æfa atriði og sýna svo skólafélögunum afraksturinn. Sjálfur ætla ég að beita mér fyrir því að við byrjum á laginu Don"t Stop Believing með Journey, sem er svona klassískt Glee-lag.“

alfrun@frettabladid.is