Sólarlagið heillar

Íslenska kvöldsólin skartar sínu fegursta nú þegar dagurinn tekur vart enda. Landsmenn og ferðamenn fara í miðnæturferðir og fylgjast með sól síga í sæ. Strandlengjan meðfram Sæbraut og Grótta eru vinsælir útsýnisstaðir.

„Fólk sækir bæði í strandlengjuna við Sæbraut og út í Gróttu og nánast út að vitanum. Fólki finnst magnað hvað sólin er lengi á himni,“ segir Auður Halldórsdóttir hjá upplýsingamiðstöð ferðamanna í Reykjavík.

Mikið af fólki hefur undanfarið safnast á útsýnisstaði á kvöldin, þar sem gott er að fylgjast með sólarlaginu. Það á jafnt við um Íslendinga og ferðamenn.

Sólfarið í Reykjavík hefur notið mikilla vinsælda sökum þessa, ásamt Gróttu og Ingólfshóli.

Auður segir töluvert um að fólk spyrji út í miðnæturferðir, þar sem hægt sé að njóta birtunnar. Hún segir ýmislegt í boði.

„Það er hægt að fara í Esjugöngu, snorklaá Þingvöllum og fara í miðnæturgolf. Þetta er allt geysivinsælt.“

Auður segir íslensku kvöldsólina einnig sérstaka. „Þessi fallega kvöldsól er sérstaða. Ef fólk ferðast um Norðurland getur það séð sólina dýfa tánum rétt ofan í sjóinn og koma svo upp hálftíma seinna. Ef þú ert í Berlín eða London þá er dimmt á þessum tíma.“

Ólöf Ýrr Atladóttir, ferðamálastjóri tekur í sama streng.

„Lega landsins og þau náttúrufyrirbrigði sem hún gefur aðgang að á himni er eitt af því sem skapar sérstöðu á Íslandi.“

Ólöf segir birtuna heilla ferðamenn.

„Fólk kemur hingað vitandi af þessum björtu sumarnóttum.“

katrin@frettabladid.is