Ástþór andvaka yfir framboði í uppnámi

Jóhannes Tómasson, upplýsingafulltrúi hjá innanríkisráðuneytinu, segir Ástþór Magnússon ekki hafa gert athugasemdir við tiltekna lista annarra frambjóðenda til embættis forseta. Hann hafi ekki tilgreint athugasemd sína nánar en að hann sæi á meðmælendalistum annarra frambjóðenda sömu rithönd.

Ástþór Magnússon lét færa til bókar athugasemdir við meðmælalista annarra frambjóðenda á fundi í innanríkisráðuneytinu á laugardag.

Ástþór vill ekki gefa upp hvaða listar það hafi verið sem annmarkar voru á að hans mati. „Þetta var bara lausleg yfirferð. Þetta er þó nokkuð augljóst á lista eins frambjóðanda úr einu kjördæmi," segir Ástþór. „Það er ekki mitt að fara yfir listana. Ég hef engin tæki eða kunnáttu til að meta undirskriftirnar. Kjörstjórnin er að votta listana án þess að fara nógu vel yfir þá."

Ástþór gerir einnig athugasemd við að kjörstjórnin hafi legið á listum í meira en mánuð eftir að þeim var skilað. Fleiri einstaklingar hafi undirbúið listana áður en þeim var skilað til kjörstjórnar.

Samkvæmt upplýsingum frá yfirkjörstjórn voru allir listarnir vottaðir án fyrirvara nema listi Ástþórs úr Norðausturkjördæmi. Engar athugasemdir voru gerðar við lista annarra frambjóðenda. Einn hefur kært meinta undirskriftarfölsun á lista Ástþórs í Norðausturkjördæmi til lögreglu. Við undirskriftarfölsunum liggja viðurlög í almennum hegningarlögum. Setur þetta ekki framboð Ástþórs í uppnám? „Að sjálfsögðu gerir það það. Ég er andvaka yfir þessu," segir hann.

Um þá rannsókn sem ráðuneytið rekur nú segir Jóhannes: „Ráðuneytið gerir almenna athugun á framboðsgögnum forsetaframbjóðenda. Í rauninni er þetta almenn skoðun á vottunum frá kjörstjórnum."

Auglýst verður á morgun hverjir verða í framboði til forseta.- bþh