Innlent

Gagnrýndi fyrirhugaðar aðgerðir ESB

Össur Skarphéðinsson utanríkisráðherra gagnrýndi harkalega hugmyndir sem eru til umræðu innan ESB um refsiaðgerðir gegn Íslandi vegna makríldeilunnar, á fundi EES-ráðsins í gær. Þar voru fulltrúar EFTA-ríkjanna og Danir fyrir hönd ESB.



„Ég gagnrýndi ályktun sjávarútvegsnefndar Evrópuþingsins og þau drög sem af hálfu þess liggja fyrir um mögulegar aðgerðir sem kann að verða gripið til gegn Íslandi og Færeyjum," sagði Össur. Hann sagðist þó hafa tekið skýrt fram að vilji Íslendinga væri að ná niðurstöðu um málið til að koma í veg fyrir ofveiði úr stofninum.



Össur segist hafa sagt sumar þær aðgerðir sem lagðar eru til ganga gegn reglum Alþjóðaviðskiptastofnunarinnar, innri markaðarins, sem Íslendingar eru aðilar að, og sérstaklega bókun níu í EES-samningnum.



„Ég sagði það lítinn álitsauka fyrir EES á 20 ára afmælisári samningsins, ef ESB ætlaði að beita ólögmætum aðgerðum í deilunni um makrílveiðar. Ég sagðist ekki trúa að svo yrði fyrr en höndin væri lögð í sárið."



Össur sagði að honum hafi skilist af ræðu Jonas Gahr Støre, utanríkisráðherra Noregs, á fundinum að Støre teldi að aðgerðir yrðu að vera í samræmi við EES samninginn og það væri ánægjuefni. - þj

Tengd skjöl



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.