Rekstrarniðurstaða OR batnaði til muna

Orkuveita Reykjavíkur birti í gær ársreikning fyrir 2011. Rekstrartekjur fyrirtækisins hækkuðu um 20% og rekstrarkostnaður lækkaði um rúm 11%. Gríðarháar skuldir sliga enn fyrirtækið en sparnaðaráætlun stjórnar hefur staðist til þessa.

Orkuveita Reykjavíkur (OR) tapaði 556 milljónum króna á árinu 2011 samanborið við 13,7 milljarða hagnað á árinu 2010. Viðsnúningurinn skýrist að stærstu leyti af veikingu krónunnar á árinu sem hefur hækkað virði erlendra skulda fyrirtækisins. Áætlanir stjórnar OR um tiltekt í rekstri fyrirtækisins hafa hins vegar staðist og gott betur en rekstrarhagnaður fyrirtækisins rúmlega tvöfaldaðist á milli ára.

Rekstrartekjur hækkuðu þannig úr 27,9 milljörðum í 33,6 milljarða á meðan rekstrarkostnaður lækkaði úr 14,0 milljörðum í 12,4 milljarða.

Þetta er meðal þess sem fram kemur í ársreikningi OR fyrir árið 2011 sem birtur var í gær. Sem fyrr ber að skoða rekstur OR með hliðsjón af þungri skuldastöðu fyrirtækisins en í mars á síðasta ári var kynnt aðgerðaáætlun sem miðar því að tryggja rekstrargrundvöll fyrirtækisins. Þar á meðal samþykktu sveitarfélögin sem eiga fyrirtækið að veita því 12 milljarða króna víkjandi lán.

Áætlun OR nefnist „Planið“ og nær til ársins 2016. Í henni hefur fyrirtækið sett sér markmið um hagræðingu í rekstri á hverju ári til og með 2016. Stefnir það að því að ná fram sparnaði sem nemur rétt rúmum 50 milljörðum króna á tímabilinu umfram fyrri áætlanir, meðal annars með sölu eigna, frestun fjárfestinga og hagræðingu í rekstri.

Mun fyrirtækið framvegis birta skýrslu um hvernig miðar að ná settum markmiðum samhliða birtingu ársfjórðungsuppgjöra. Slík skýrsla var birt í annað sinn í gær.

Kemur þar fram að markmið OR um að bæta sjóðflæði fyrirtækisins um 11,5 milljarða á árinu 2011 náðist en alls var það bætt um 12,7 milljarða þrátt fyrir óhagstæða þróun ytri breyta. Var raunárangur í flestum tilfellum talsvert betri en stefnt var að en sérstaka athygli vekur þó að rekstrarkostnaður var lækkaður um tæpar 750 milljónir sem er langt umfram markmið stjórnar sem hljóðaði upp á 300 milljónir.

Í tengslum við lækkun rekstrarkostnaðar hefur starfsfólki verið fækkað nokkuð hjá OR eða um alls 68 á árinu. Þá hefur starfsmönnum fækkað um 154 frá því þegar mest var árið 2008.

magnusl@frettabladid.is