Horn ekki á markað á næstunni

Horn fjárfestingafélag, dótturfélag Landsbankans, verður ekki skráð á hlutabréfamarkað á næstunni eins og til stóð. Stefnt er að því að taka ákvörðun um framtíð Horns á næstu vikum.

Í tilkynningu Landsbankans kemur fram að bankinn telji óvíst að hann mundi ná því markmiði sínu að selja 80 til 90 prósenta hlut í félaginu á skömmum tíma með skráningu í Kauphöllina. Því hafi bankinn ákveðið að kanna fleiri leiðir varðandi sölu á Horni.

Enn fremur segir að bankinn leggi áherslu á að hámarka virði eignarhluta sinna í félögum. Þá sé stefnt að því að draga úr vægi hlutabréfaeignar í félögum í ótengdum rekstri á efnahagsreikningi bankans.

Heildareignir Horns eru um 30 milljarðar króna og er eigið fé félagsins um 24 milljarðar. Meðal eigna félagsins eru Intrum Justitia, 3,95 prósenta hlutur í Eimskipi, 12,5 prósent hlutur í Eyri Invest og 49,9 prósenta hlutur í Promens.

Samkvæmt formlegum áætlunum Kauphallarinnar er gert ráð fyrir sjö nýskráningum á þessu ári þótt einhverjar þeirra kunni að dragast fram á næsta ár. Horn átti að vera fyrst í þessum eða næsta mánuði en flestar nýskráninganna áttu að vera haust. Í desember síðastliðnum fór fyrsta nýskráning félags í Kauphöllina eftir bankahrun fram þegar Hagar voru skráðir á markað.- mþl