Hjólageymsla byggð fyrir ráðuneytisfólk

Sprenging er í notkun reiðhjóla hjá starfsfólki stjórnarráðsins. Starfsmenn menntamálaráðuneytisins hjóla mest allra. Engin aðstaða er fyrir hjólin svo reisa á geymslu sem verður í fiskihjallastíl til að minnast Sölvhólsbæjarins.

Starfsmenn ráðuneyta hafa brugðist svo vel við ákalli yfirvalda um að nota ekki einkabíla til að koma sér til vinnu að þörf er orðin á því að byggja sérstakt hjólaskýli á stjórnarráðsreitnum.

Guðmundi Gunnarssyni arkitekt var falið að skoða möguleika á staðsetningu hjólaskýla og gera tillögu að hönnun þeirra. Í bréfi Guðmundar til skipulagsfulltrúa Reykjavíkur segir að annars vegar sé gert ráð fyrir skýli við norðurgafl Arnarhvols og hins vegar á horni Sölvhólsgötu og Skuggasunds. Segir Guðmundur að vegna hugmynda um frekari uppbyggingu á stjórnarráðsreitnum í framtíðinni verði skýlin aðeins til bráðabirgða þótt ljóst sé að þau muni standa í nokkur ár.

„Vegna þeirrar stefnu sem stjórnvöld hafa tekið um sjálfbæra þróun hafa starfsmenn ráðuneyta verið hvattir til að nýta sér annan ferðamáta en einkabílinn. Hefur þetta leitt til þess að fjöldi starfsmanna mætir nú til vinnu á reiðhjóli," útskýrir Guðmundur fyrir skipulagsstjóra.

Þær upplýsingar fengust hjá stjórnarráðinu að fremst í flokki hjólreiðamanna í stjórnarráðinu sé starfsfólk menntamálaráðuneytisins sem jafnvel hjóli ofan úr Grafarvogi í misjöfnu færi og veðri. Búast megi við mikilli aukningu með vorinu.

„Það er fjöldi manns sem mætir hér alltaf á hjóli og þeim fer sífellt fjölgandi," segir Þorgeir Ólafsson, upplýsingafulltrúi menntamálaráðuneytisins. „Þannig að það má alveg til sanns vegar færa, það er mikill líkamsræktaráhugi hér." Samkvæmt tillögu Guðmundar á fyrst að byggja 32 hjóla geymslu við Sölvhólsgötu.

„Hugmyndin byggir á minningum um hjallinn við gamla Sölvhólsbæinn en fiskihjallarnir eru ríkur þáttur í menningar- og byggingarsögu landsins," segir í erindi Guðmundar sem kveður fáa vita um tilvist gamla Sölvhólsbæjarins í dag og því fari vel á að minnast bæjarins á þennan hátt. „Auk þess er uppbygging gömlu hjallanna sem sniðin að kröfum um hönnun á hjólaskýlum nútímans, örugg lokun og góð loftræsting." gar@frettabladid.is