Magntollar en ekki verðtollar

Landbúnaðarráðherra verður skylt að úthluta tollkvótum fyrir landbúnaðarvörur þegar sýnt þykir að ekki verði nægjanlegt framboð á viðkomandi vöru á innanlandsmarkaði. Miða á við magntolla við úthlutun en ekki verðtolla.

Þetta er meðal þess sem lagt er til í frumvarpi um breytingu á lögum um framleiðslu, verðlagningu og sölu á búvörum og tollalögum.

Lagðar eru til breytingar sem fela í sér að ekki verði lengur um að ræða framsal á valdi Alþingis til ráðherra til að ákveða toll á vörur sem fluttar eru inn samkvæmt tollkvótum, heldur mun tollurinn ákvarðast á grundvelli hlutlægra viðmiða sem kveðið er á um í lögunum.

Í áliti umboðsmanns Alþingis frá því síðastliðið sumar var bent á að þær heimildir sem landbúnaðarráðherra væru veittar til álagningar tolla væru ekki í samræmi við kröfur um skattlagningarheimildir samkvæmt stjórnarskrá. Með frumvarpinu er reynt að bregðast við athugasemdum umboðsmanns.

Steingrímur J. Sigfússon landbúnaðarráðherra sagði þegar hann mælti fyrir frumvarpinu að stefnt væri að því að tryggja ákveðna verðsamkeppni á markaði með því að tryggja að vara væri ávallt fáanleg frá fleiri en einum framleiðanda.

- ibs