Vill auka öryggi í smábátum

Ásbjörn Óttarsson, þingmaður Sjálfstæðisflokksins, hvetur Ögmund Jónasson innanríkisráðherra til þess að lögleiða björgunarflotbúninga um borð í öllum skipum. Í dag er bátum undir tólf metrum ekki gert að hafa slíka búninga um borð. Ögmundur ætlar að beita sér fyrir því að málið verði skoðað í ráðuneytinu en tillaga þessa efnis hefur legið í ráðuneytinu árum saman.

Ásbjörn vakti máls á þessu atriði í öryggismálum sjómanna í óundirbúnum fyrirspurnartíma á þinginu í gær. Fyrirspurnin á rætur að rekja til hins alvarlega slyss sem varð úti fyrir ströndum Noregs nýlega þar sem þrír skipsverjar fórust með skipinu Hallgrími SI 77. Eiríkur Ingi Jóhannsson, fjórði skipsverjinn um borð, komst lífs af eftir tæplega fjögurra klukkutíma volk í sjónum, en hann var klæddur björgunarflotbúningi.

Í fyrirspurn sinni sagði Ásbjörn að einungis væri skylt að hafa vinnuflotbúninga um borð í minni bátum. Þetta veitir falskt öryggi, að mati Ásbjörns. Vék hann að því að hann hefði fyrst tekið málið upp á þinginu árið 2009 og enn fremur að tillaga frá Siglingaráði, sem er ráðgefandi fyrir fagráðherra um öryggismál sjómanna, hefur legið fyrir í ráðuneytinu frá því árið 2004. Tillagan gerir ráð fyrir því að það verði gert skylt að björgunarflotbúningar séu um borð í öllum skipum sem róa í atvinnuskyni við Íslandsstrendur.

„Þetta er mjög mikilvægt að þetta verði gert núna, en strandveiðar hefjast aftur 1. maí og þar eru menn að róa við tvísýn skilyrði. Það er mín skoðun, því miður, er það aðeins spurning um hvenær, en ekki hvort, að slys verði,“ sagði Ásbjörn.

Örn Pálsson, framkvæmdastjóri Landssambands smábátaeigenda, segir að félagið hvetji til þess að nefndir björgunarflotbúningar séu um borð í bátum félagsmanna, hafi menn til þess aðstöðu. Hins vegar sé málið ekki svarthvítt og umræðan sé viðkvæm í ljósi atburða síðustu daga. Félagið hafi ekki fallist á að binda ákvæðið í lög. „Frekar höfum við lagt á það áherslu að menn klæðist vinnuflotgöllum og reyni að komast í björgunarbát, sé þess nokkur kostur.“ Örn segir að félagið muni leita til Siglingastofnunar um ráðgjöf og faglega skoðun á málinu.

Ögmundur tók erindinu vel og ætlar að beita sér fyrir því að málið verði skoðað, hratt og vel.

svavar@frettabladid.is