Sjónarspil að sjá 430 manns hjóla af stað

Bláalóns þrautin fór fram í dag þegar 430 manns hjóluðu saman frá Hafnarfirði og að Bláa Lóninu. Leiðin er 60 km. Ljósmyndarinn Vilhelm fór á stúfana og myndaði keppendur á leiðinni.

Sá fyrsti kom í mark eftir 1 klukkutíma og 40 mínútur. Þeir síðustu voru upp undir fimm tíma á leiðinni. „Þetta er bara einstakt afrek," segir Pétur Þór, sem stóð á bak við keppnina. „Það sýnir bara hversu mikið afreksfólk við eigum í þessari íþrótt."

„Einhverjir duttu og fengu skrámur. Það var kallaður til sjúkrabíll þegar einn datt illa en sá ákvað engu að síður að klára þrekraunina," segir Pétur. Þegar upp var staðið réði gleðin för og stemningin var góð.

Eftir keppnina fengu keppendur kjötsúpu og fóru svo í Bláa Lónið. „Það var svolítið troðið að vísu. Þeir sem nenntu að bíða komust að lokum og það vær kærkomið að hvíla lúin bein."