Veitti verjanda Baldurs ráðgjöf

Róbert Ragnar Spanó, lagaprófessor og forseti lagadeildar Háskóla Íslands, veitti verjendum Baldurs Guðlaugssonar, fyrrverandi ráðuneytisstjóra, ráðgjöf eftir að ákæra var gefin út á hendur honum fyrir innherjasvik.

Þetta upplýsir Róbert í neðanmálsgrein í nýrri bók sinni sem fjallar um réttarregluna Ne bis in idem, sem snýst um bann við endurtekinni málsmeðferð sakamála.

Í bókinni fjallar Róbert meðal annars um mál Baldurs, eins og greint hefur verið frá í Fréttablaðinu. Þar kemst hann að þeirri niðurstöðu að Fjármálaeftirlitinu hafi að öllum líkindum ekki verið heimilt að taka rannsókn málsins upp aftur eftir að hafa tilkynnt Baldri um niðurfellingu þess. - sh