Leitast eftir að loka á glufu í gjaldeyrishöftunum

Nú stendur yfir umræða á Alþingi um herðingu á gjaldeyrishöftunum þar sem leitast er eftir að loka á gjaldeyrisútflæði í gegnum glufu á höftunum. Búist er við að frumvarpið verði samþykkt í kvöld. Greiningaraðili segir breytinguna minnka traust erlendra aðila.

Frumvarpið var lagt fyrir á Alþingi nú á sjötta tímanum en þingflokksfundir voru óvænt boðaðir klukkan fjögur síðdegis eftir að fjármálamörkuðum var lokað.

Um þrenns konar breytingar er að ræða. Í fyrsta lagi er undanþágu heimild til útgreiðslna í íslenskum krónum úr innlendum þrotabúum til erlendra aðila felld úr gildi, til dæmis úr greiðslur úr þrotabúum föllnu bankanna til kröfuhafa erlendis. Í öðru lagi eru þrotabú föllnu bankanna ekki lengur undanþegin gjaldeyrishöftunum. Í þriðja lagi hefur verið lokað á að erlendir eigendur skuldabréfa geti tekið útafborganir og verðbætur af höfuðstól út í erlendri mynt.

Ástæða fyrir hraðri meðferð málsins er meðal annars að eitt þessarra skuldabréfa, HFF14, er á gjalddaga nú á fimmtudaginn þegar gert var ráð fyrir að um 6-7 milljarðar króna myndu streyma úr landi en tugi milljarða hafa nú þegar streymt úr landi vegna þessarra breytinga.

Þorbjörn Atli Sveinsson sérfræðingur hjá greiningardeild Arion Banka segir þessa breytingu minnka traust fjárfesta og vera örþrifaráð.

„Ég hef miklar áhyggjur af að menn séu ekki að hugsa þetta alla leið, að bregðast við gjalddaga á fimmtudaginn í stærra samhengi er þetta mjög alvarlegt og ég hef áhyggjur af næstu skrefum í fjárfestingaleið og áhættuálag á Ísland hlýtur að hækka ef við erum að gera svona hluti eftir á," sagði Þorbjörn.