Þjórsá klýfur Samfylkingu

Þingflokkur Samfylkingarinnar er klofinn í afstöðu sinni til þess hvort færa beri neðri hluta Þjórsár úr virkjanaflokki í biðflokk í rammaáætlun um verndun og nýtingu vatnsafls og jarðvarma. Enn er jafnframt deilt innan stjórnarflokkanna um stöðu nokkurra virkjanakosta á miðhálendinu í rammaáætlun.

Til stóð að leggja endanlega þingsályktunartillögu um rammaáætlun fyrir ríkisstjórnina á fundi hennar í gærmorgun en málinu var frestað á síðustu stundu, þar sem Samfylkingin var ekki reiðubúin að taka lokaafstöðu til málsins.

Sumir þingmenn flokksins taka undir þá skoðun Vinstri grænna að endurskoða eigi neðri hluta Þjórsár sem virkjanakost í ljósi þess að fram séu komnar nýjar upplýsingar um viðgang laxastofnsins í ánni. Frekari rannsóknir kalli á að Þjórsá fari í biðflokk. Hluti þingflokksins vill hins vegar ganga lengra í virkjanamálum.

Samkvæmt upplýsingum Fréttablaðsins er þó almenn samstaða innan atvinnuveganefndar Alþingis um að breyta upprunalegum drögum að rammaáætlun eins lítið og mögulegt er. Innan Samfylkingarinnar er það sjónarmið uppi að ekki eigi að hreyfa mikið við virkjanakostum, þar sem áætlunin sé lögð fram til framtíðar og verði að geta staðið af sér ríkisstjórnarskipti.

Samkvæmt þingmálaskrá átti að leggja rammaáætlun fram í byrjun febrúar, en málið er enn á borði Oddnýjar G. Harðardóttur iðnaðarráðherra. Til stendur að taka málið upp á þingflokksfundi Samfylkingar á mánudag. Samkvæmt þingsköpum verður að leggja fram frumvörp fyrir 1. apríl til að þau verði tekin á dagskrá. -sv