Meirihlutinn bendir á Sigrúnu og Gunnar

Bæjarfulltrúinn Gunnar Birgisson og Sigrún Ágústa Bragadóttir, framkvæmdastjóri Lífeyrissjóðs starfsmanna Kópavogsbæjar (LSK), bættu við setningu í tilkynningu til Fjármálaeftirlitsins (FME) þar sem var fullyrt að lánveitingar sjóðsins til Kópavogsbæjar stæðust lög.

Þetta fullyrða fjórir þeirra sex sem nú sæta ákæru fyrir að hafa blekkt FME og segja setninguna ekki hafa verið í upphaflegum drögum að tilkynningunni sem þeir sáu.

Þetta kemur fram í greinargerðum sem allir ákærðu í málinu hafa skilað til Héraðsdóms Reykjaness, utan Sigrúnar Ágústu, sem ekki hyggst skila slíkri greinargerð. Sigrún og Gunnar sæta ákæru eins og áður segir, auk bæjarfulltrúanna Flosa Eiríkssonar og Ómars Stefánssonar, og tveggja fulltrúa starfsmanna bæjarins í stjórn þáverandi sjóðsins, Jóns Júlíussonar og Sigrúnar Guðmundsdóttur.

Sexmenningunum er gefið að sök að hafa ávaxtað fé sjóðsins með ólögmætum hætti, með því að lána Kópavogsbæ 600 milljónir króna um og eftir hrun, og blekkja FME með áðurnefndri tilkynningu.

Allir þeir fimm sem hafa skilað greinargerð neita sök í málinu og rökstyðja þá afstöðu sína á keimlíkan hátt.

Fyrir það fyrsta bera tveir sakborninganna, Gunnar og Ómar, því við að fjárfesting sjóðsins í peningamarkaðsskuldabréfum til Kópavogsbæjar hafi hreinlega verið heimil, þvert á það sem fullyrt er í ákærunni. Þeir benda á að peningamarkaðslán geti talist verðbréf sem ekki séu skráð á skipulegum markaði og að heimilt sé að fjárfesta í slíkum bréfum upp að vissu marki.

Þá segjast fimmmenningarnir ekkert hafa haft með form lánveitingarinnar að gera og að sá frágangur hafi allur verið á hendi framkvæmdastjórans Sigrúnar Ágústu.

Að síðustu krefjast sakborningarnir allir sýknu á þeim grundvelli að málið sé fyrnt. Sök í málum sem þessum fyrnist á tveimur árum en fresturinn rofnar um leið og rannsókn hefst á því hvort viðkomandi hafi brotið af sér.

Allir telja sakborningarnir að rannsóknin hafi í upphafi snúið að öðrum sakarefnum en þeim sem að endingu var ákært fyrir. Því hafi fresturinn ekki rofnað þá. Jafnvel þótt það verði ekki tekið gilt verði ekki fram hjá því litið að meira en tvö ár hafi liðið frá því að rannsókn hófst og þar til ákæra var gefin út í lok síðasta árs.

Aðalmeðferð í málinu fer fram í næstu viku.

stigur@frettabladid.is