"Nunnuvæðing í nútímastíl og meyjarhaftavörn sem kallast femínismi"

„Loksins er komin niðurstaða í máli sem flestir voru búnir að gleyma. Það eru svo mörg önnur spennandi þjóðmál í gangi." Svona hefst pistill Guðbergs Bergssonar rithöfundar á bloggsíðu sinni í dag.

Þar fjallar hann um „Gillz-málið" svokallaða en ríkissaksóknari tók ákvörðun á dögunum að ákæra ekki Egil Einarsson, oft kallaðan Gillzenegger, eftir að hann var kærður, ásamt unnustu sinni, fyrir nauðgun.

Pistillinn hefur vakið mikla athygli í dag. „Hann átti sína gullnu tíð efst á stalli. „Allar vildu meyjarnar eiga hann," eins og segir í ljóði, og eflaust karlmenn líka, að minnsta kosti vöðvana. Stráksi var klár að koma sér áfram og vildi eðlilega nota tímann vel á meðan hann væri enn á líkamsræktaraldri," skrifar Guðbergur.

„Svo henti það, sem alltaf gerist, að glæsimennið er ásakað fyrir að hafa farið í óleyfi upp á stelpu og hún heimtar hjónaband eða pening. Áður var hlegið í þorpum að þannig stelpupussulátum en nú er öldin önnur á íslenska menningarlandinu. Þar er komin í spilið viss nunnuvæðing í nútímastíl og meyjarhaftavörn sem kallast femínismi."

Hann bendir á að nú þegar Egill hefur verið hreinsaður af ákæru vilji auðvitað enginn kannast við heift sína í hans garð. „Fólk er fljótt að snúa við blaðinu í skoðunum og fá nýja kennitölu á fyrirtækið Sómakennd. Með nýju kennitölunni hefur það gleymt að það hafi ekki einu sinni viljað fletta símaskránni vegna þess að skepnan, nauðgarinn var framan á henni eða það hafi viljað fá miða til þess að líma yfir syndaskrokkinn á honum eða skráin yrði hreinlega afturkölluð, hún brennd á táknrænni galdrabrennu og ný gefin út á vegum femínistafélagsins."

Pistil Guðbergs má lesa í heild sinni hér.