Jónína og Gunnar hætt í Krossinum

Gunnar Þorsteinsson og eiginkona hans, Jónína Ben, eru hætt í Krossinum. Þetta kemur fram á Fésbókarsíðu Jónínu.

„Ég hef sagt mig úr Krossinum," skrifar Jónína. „Gunnar minn hefur endanlega verið sigraður í þeirri kirkju sem hann byggði upp og það af sömu öflum og reyndu að knésetja hann þegar við giftum okkur."

Undir lok árs 2010 sagði Gunnar af sér sem forstöðumaður Krossins. Hann hafði þá verið sakaður um að hafa brotið kynferðislega gegn konum þegar þær voru á unglingsaldri.

Þá skrifar Jónína: „Ég varð fyrir þvílíkri persónulegri árás inn í hjarta mitt af fyrrum konu Gunnars og hann líka fyrir framan söfnuðinn að við erum sem lömuð."

„Gunnar minn er brotinn vegna þeirrar árásar sem á hann eru lagðar endalaust. En hann er fastur í trúnni og neitar að gefast upp. Guð launi ykkur. Ég hef sannfærst um að lítið er sameiginnlegt með trú og kirkjum í dag. Valdabröltið og illmælgi ráða þar ríkjum, í Krossinum sem og annars staðar. Kirkja á að vera opin öllu fólki en ofstæki ræður nú ríkjum í Krossinum, eina ferðina enn. Það er stór hættulegt veikum sálum. Leitt að þurfa að skrifa þetta hér en fjölmiðillinn minn er Facebook."

Hægt er að nálgast færsluna á Fésbókarsíðu Jónínu.